Azamat bu’gin de sabaqqa keshigip keldi. Auditoriyag’a kirip o’zinin’ partasına barıp otırdı ha’m ku’ndegidey ja’ne sabaqqa itibar bermesten qag’azg’a bir na’rselerdi jaza basladı. Keyin qag’azdı aldıraqtag’ı partada otırg’an Gu’lnur ta’repke uzatıp jiberdi. Gu’lnur qag’azdı oqıp, hesh na’rse bolmag’anday itibarin sabaqqa qarattı.

Gu’lnurda Azamattı jaqsı ko’redi, biraq onın’ ju’ris turısın Gu’lnur unatpas edi. Sebebi Gu’lnur Azamattı bardamlı, bay, menmen ha’m ko’p qızlar menen ju’rip keyin qoyısıp ketetug’ın jigitlerdin’ qatarında dep oyladı. Al bunday jigitler Gu’lnurg’a jaqpaytug’ın edi.

Azamat Gu’lnurdın’ ha’reketin ko’rip kewli buzıldı, biraq ele u’mitin u’zgen joq.Muxabbatı bug’an jol qoymas edi. Sebebi ol Gu’lnurdı bir ko’rgennen jaqsı ko’rip qalg’an edi.

Ele esinde oqıwg’a birinshi kelgen ku’nleri Gu’lnurdı ko’rip, qattı jaqsı ko’rip qalg’an edi. Bunı sezgen dostı Aybek og’an - “Bunday qızlarg’a unaw ushın u’stin’de son’g’ı u’lgidegi kiyim, qaltan’da tolı aqsha, astın’da mashinan’ bolıwı kerek” degen edi. Sol ku’nnen baslap Azamat Gu’lnurdı o’zine qaratıw ushın qolınan kelgen ha’mme na’rseni isledi, biraq mine aradan yarım jıl o’tse de hesh qanday o’zgeris joq edi.

Ha’r ekshembide Gu’lnur bazar aylanatug’ın edi. Bu’gin de jumısların pitirip bazarg’a barıp kerekli na’rselerin aldı. Ju’gi awır bolg’anı sebepli “arbakesh”lerden ja’rdem soramaqshı bolıp bir balanın’ qasına keldi ha’m balanı ko’rip qolındag’ı sumkaları tu’sip ketti. Aldında turg’an bala Azamat edi. Azamat Gu’lnurdı ko’rip qorqtıma ya uyaldıma artına qarap ketip qaldı. U’yine keldi de xanasına kirip jatıp qaldı. Endi Gu’lnur onı ku’ndegiden de ko’birek jaman ko’rip qalatug’ın boldı. Usı oylar menen kesh tu’skeninde sezbey qalıptı. Eger telefonına qon’ıraw kelmegende azang’a shekem usılay otıratug’ın edi. Azamat kim qon’ıraw qılıp atırg’anın biliw ushın telefonın qolına aldı, Gu’lnurdın’ nomerin ko’rgen son’ ha’mme na’rseni umıtıp Azamattın’ ju’zine ku’lki juwırdı.


Alibek Qudaybergenov.