Qon’sım menen qızlardın’ erte turmısqa shıg’ıwı haqqında so’ylesip otırg’an edim. Ol bılay g’ap basladı, - Lobar degen ag’ayınım bar. A’kesi Lobardı 9-klass pitkeriw imtixanların tamamlamastan-aq onı turmısqa berip jiberdi. Qızı ju’da jaqsı oqıytug’ın edi, a’sirese inglis tili ha’m rus-tilin jaqsı biletug’ın edi. İntası, talantı bar edi. Lobardın’ qarsılıqların a’kesi tın’lamadı.

Lobar barqulla ku’yewinen, qayınenesinen nalır edi. Qayınenesi bolsa kelininen. Jaqın ag’ayın bolg’anları ushın Lobar ja’njellesip qalsa, ag’ayınler kelin ha’m ku’yew ta’repke bo’lindi. Na’tiyjede ag’ayınler arası suwıdı.

Kelin u’y jumısların islegende nalıp ju’rer, al birewdin’ so’zi jaqpasa ashıwlana beretug’ın edi. Bul o’z na’wbetinde qayınenesine jaqpadı. – Anan’ u’yretpegen, hesh na’rseni bilmeysen’-dep urısa beretug’ın edi. Endi g’ana 17 jasqa tolg’an qız qayerden bilsin xojalıq jumısların.

Bul ha’m jetpegendey perzenti qarnında nabıt boldı. Al ku’yewi onı unatpaydı, sonlıqtan og’an basqasha so’yler edi. Lobardın’ a’rmanı tilshi bolıw, kitaplar jazıp xalıqqa tanılıw, joqarı jetiskenliklerge erisiwdi qa’leytug’ın edi. Turmıs ta’shwishleri menen qız to’rkinine qaytıp keldi ha’m izinen ajırasıw haqqında xat keldi.

U’yindegiler – ku’yewin’nin’ u’yine bar, a’ken’nin’ arı keledi – dedi. Lobardın’ ko’z jasları da’rya bolıp aqtı. Ku’nlerden bir ku’ni ajırasıw ushın sudqa bardı, ajırastı. Sol ku’nnen baslap onı hesh kim ko’rmedi. Kimlerdur Rossiyag’a ketti dese, ja’ne birewler Tashkentke turmısqa shıqqan degen so’zler tarqaldı.

Juwmaq

Lobar 19 jasında turmısqa shıg’ıp, ajırasıpta u’lgerdi. Usı jerde orınlı soraw – Kim ayıplı?

Lobar oqısa u’yrense, pishiw tigiwdi, aspazlıq sırların u’yrense, so’ylew ma’deniyatın u’yrenip, kimge qalay so’ylewdi an’lag’annan keyin turmısqa shıqqanında ba’lkim bunday unamsız jag’daylar bolmaspa edi?Lobardın’ ata-anası perzentinin’ kewline qarag’anda, onın’ qızıg’ıwshılıqların, niyetlerin a’melge asırg’anda bunday unamsız jag’daydın’aldı alıng’an bolar edi. Qızdı du’nyag’a keltiriwin’iz onı keleshekte baxıtsız o’mir su’riwine ma’jbu’r qıla alasız degeni emes…


Beradaq atındag’ı QMUnin’
2-kurs studenti Sultanova Zulxumor