Aysanem menen Baxtiyar “agent”ten tanısıp, ko’p waqıtqa shekem so’ylesip ju’rdi. Olar usı baylanıs quralı arqalı-aq bir-birine baylanıp, jaqın bolıp qaldı. Birin-biri ko’rmey atırıp-aq muxabbat sezimleri oyandı. A’sirese Aysa’nem Baxtiyardın’ barlıq aytqan so’zlerine isenip, “ku’ydim, pistim” degenlerine, birotala “erip” ketti. Olar “agent” arqalı u’sh-to’rt ay so’ylesip ju’rdi. Aysa’nem onın’ menen bir ushırasıwdan-aq o’zin turmıs qurıwg’a tayarday sezindi.

Bir ku’ni Baxtiyar “agent” arqalı Aysa’nem menen ja’ne baylanısıp “erten’ bir jerde ushırasayıq, joramnın’ tuwılg’an ku’ni edi, sog’an birge barayıq”, - dep mirat etti. Ko’pten berli ju’zbe-ju’z ko’risiwge intizar bolıp ju’rgen qızg’a da’rriw maqul tu’sti ha’m anasına “gruppalas dostımnın’ tuwılg’an ku’ni edi, qonıp qaytaman” - dep aldap, keshki payt u’yden shıg’adı. Anası da qızına isenip, a’kesine isenimli u’yge ketti dep kewlin qa’tirjam etedi.

Aysanem Baxtiyardı ko’rip, o’zin eski tanıslarday tuttı. Qol telefonın o’shirip, o’z erkin og’an tapsıradı. Zıyapatqa barıp emen-erkin otırıp, jigitler menen ten’dey araq ishti. Son’ Baxtiyardın’ jetegine erip, qayaqqadur bardı…

Ma’s bolıp qalg’an Aysa’nem hesh na’rse esley almadı. Tek g’ana Baxtiyardın’ “seni jaqsı ko’remen, bizler turmıs quramız, senin’ ushın u’sh aydan berli telefonda qansha pullarımdı sarıpladım” degenlerin esler edi. Ol bası men’-zen’ bolıp u’yine qayttı.

“Mag’an hesh na’rse bolmadı, men jaqsıman”, - dep o’z-o’zine ta’selle berer edi. Birin-biri quwalap ku’nler, aylar o’te berdi. Ol tez-tez awırıp, ju’regi aynıp, ashıwshaq bolıp, ju’ris-turısı, minez qulqı o’zgerip ketti. O’zindegi bul o’zgeristi sezse de, onday oyg’a barg’ısı kelmedi. Qızının’ to’sek tartıp jatıp qala bergenliginen ta’shwishlengen anası tanıs shıpaker dostına alıp barıp ko’rsetedi. Ol barlıq jay-jag’day menen tanısıp, qızdın’ ha’mledar ekenin aytadı. Ju’regin uslap turıp mo’ldiregen ko’zlerinen jaslar aqqan ana paqır isenimin ayaq astı etken qızına, awızına kelgen so’zdi aytıp, shashlarına asıla ketti. Albırap qalg’an qızın ashıw u’stinde shala jan qılg’anın o’zi sezbey de qaldı…

Biraq ba’ri biypayda, ba’ri kesh edi. Qızına waqtında durıs ta’rbiya bere almag’anına, saatlap telefonda otırg’anında, tergestirmegenine, qonıwg’a aldap ketkeninde jibergenligine qattı o’kiner edi.

Anası kelinin qasına aldı da, Aysa’nemdi izine ertip, Baxtiyardın’ u’yine izlep bardı. Jigittin’ anası, ha’zir balası joq ekenligin, kelini ekewi balasın alıp, qıdırıp ketkenligin aytadı. Qızının’ jag’dayın tu’sindirgende, balanın’ anası “Balamnın’ xojalıg’ı bar, onday jaman a’deti joq” – dep awızına kelgenin aytıp, da’lillep beriwin soradı. Biraq tilekke qarsı Aysa’nem hesh na’rseni da’lillep bere almaydı. Bunday qorlıqqa shıday almag’an Aysa’nem o’ksip-o’ksip jıladı.

Jaslıq ha’wes penen, isengen adamnan Aysa’nem, mayıp bolıp to’sekke baylanıp qalg’an. Anasının’ qasında u’nsiz jılap otırar edi. – Meni keshirin’ anajan, dep. Og’an anası burılıp qalg’an qolın sozıp, shashların sıypar. Lekin bir na’rse dep aytıwg’a tili aylanbas edi.

“Agent”tin’ aqıbeti Aysa’nemdi ayanıshlı awhalg’a alıp keldi. “Agent” Aysa’nemnin’ waqtın ha’m baxtın urladı.


su’wret: Q. Nurtastın’ qosıg’ınan alındı.
QMU 2 kurs studenti
Perizat Urazalieva