Bul du’nyanı qamtıp alg’an texnologiya a’siri, o’zinin’ jaqsı ta’repi menen birge, insanlarg’a zıyanlı ta’replerin tiygizip atır. Bul tuwralı aytatug’ın bolsaq, ju’da ko’p turmısta bolıp atırg’an waqıyalardın’ gu’wası bolamız. Degen menen bu’gingi ku’nde insannın’ jaqın dostısına aylang’an kompyuter, internet saytları, ha’r qıylı tanısıw tarmaqları olardın’ paydalı ta’repleri menen birge zıyanlı ta’replerin o’zlerine sin’dirip alıp atırg’anın ko’remiz. So’ylew ma’deniyatın, kiyiniw usılın, minez-xulqın, ha’tteki jas shan’araqlı insanlarda o’zindegi ma’jbu’riyatın sezbey, internet tarmag’ına baylanıp qalg’anlarda az emes. Bulardın’ arasında jas shan’araqtın’ iyesi, Paraxatta internettin’ torına tu’sken edi.

Na’tiyjede shan’araqtın’ bekkemligi ıdıradı. Paraxat son’g’ı markalı uyalı telefon alıp, internettegi tanısıw baylanıs tarmag’ında o’zgeler menen qarım-qatnas ornata basladı. Kelinshegi Gu’lparshınnan telefonın jasıratug’ın, ha’r dayım qon’ıraw kelse shetlerge jasırınıp so’ylesetin boldı. Tınbay sms-ler, o’zge insanlardan qon’ırawlar keletin boldı. Gu’lparshın bulardan gu’manlanbadı. Sebebi, eki balanın’ a’kesi, bunday oyg’a barmaydı, qıysıq joldan ju’rmeydi, dep o’zin aldadı. Ku’nlerdin’ birinde ana perzent ushın “tu’n uyqısın to’rt bo’ledi” degendey. Gu’lparshında balasının’ shırqırap jılag’an dawsınan oyanıp ketti. Qarasa uyalı telefong’a qon’ıraw kelgen. Qasında Paraxat bolsa ele uyqılamag’an qolında telefon, u’n’ilip otır. Gu’lparshın hayran qaldı. Biraq bir awız ga’p aytpastan u’nsiz kelip ornına jattı. Paraxat bolsa balanın’ jılag’anınan “uyqılalmay atırman, azanda erte jumısqa ketiwim kerek” – dep, ashıw menen hayalına jerkenip so’yledi. Tu’ngi saat 3lerde qol telefong’a sms keldi, Paraxat bunı sezbedi. Al oyaw ju’rgen Gu’lparshın balam oyanıp ketedi dep o’shirmekshi boldı. Ko’z ko’rip isenbegen, qulaq estitpegen ha’r qıylı biya’dep so’zler, biytanıs nomerden kelgen. Aljasıp jazg’an, nomerdi qa’te tergen, bunday aljasıq boladı, dep oylag’ısı keldi. Lekin…

Paraxat u’yine kesh keletug’ın, tapqan tabısın bala-shag’asına bermeytug’ın, minez-xulqı, ju’ris-turısı, o’zgerip ketti. Bul bolsa Gu’lparshındı ja’ne-ja’ne gu’manlar astında qalıwg’a ma’jbu’rledi. Gu’lparshın biytanıs nomerdi aldı da ha’m og’an qon’ıraw etti, hayal adam. Og’an eki perzenttin’ a’kesi, bir insannın’ su’yikli yarı ekenin aytadı. Bul urınıslar na’tiyjesiz edi. Telefong’a qon’ıraw, sms, internetten baylanısıp so’ylesip ju’rgenin hasla aytpadı. Gu’lparshınnın’ qa’lbine da’rt, ko’zine jas, ju’zine qayg’ı saya saldı – bul telefon!

Gu’lparshın o’z tanısları arqalı ku’yewinin’ kim menen so’ylesip ju’rgenligin anıqladı. O’z shan’arag’ın saqlap qalıw ushın, nomerdin’ iyesi menen tillesti. Telefondı o’shiriwge, basqa qaytıp qon’ıraw etpewge, so’ylespewge kelisim berdi. Bul ha’reketleri shan’araqtı saqlap qalıw ushın islenip atırg’an edi. Al Paraxat kelinsheginin’ bunday ha’reketlerin ko’rip, qılg’an barlıq islerinen pushayman bolıp, keshirim soradı. Qol telefonnan jaqsı niyette paydalanıwg’a, kelinshegine opalı, perzentlerine su’yikli a’ke, shan’arag’ının’ bekkemligine su’yenishi bolıwına wa’de berdi.


QMU 2-kurs studenti Perizat Urazalieva
Pikirlerin’iz bolsa perizat-1992-21@mail.ru g’a jazın’.