İnformatsiya texnologiyaları jedellik penen rawajlanıp atırg’an bu’gingi ku’nde shet tillerin u’yreniw, a’sirese inglis tilin u’yreniw zaman talabı. Til bilgen el biledi deydi dana xalqımız. Ha’zirgi waqıtta shet tillerin u’yreniw ushın tu’rli elektron qollanbalar, elektron so’zlikler islep shıg’ılg’an.

Al qaraqalpaq tilinde so’zlerdi 12 tilge awdarıw mu’mkinshiligin beretug’ın so’zlik bag’darlaması haqqında esittin’izbe? Bu’gin biz qaraqalpaq tilinde so’zlerdi shet tillerine awdarıw imkanın beretug’ın NS12 atlı bag’darlama haqqında aytamız.

NS12 bag’darlaması jas bag’darlamashı Nuratdin Reypnazarov ta’repinen 3 jıl dawamında bag’darlama ha’m onın’ interfeysi islep shıg’ıldı. NS12 bag’darlaması to’mendegi tillerdi o’z ishine qamtıydı ha’m birinen ekinshisine awdarmalaydı. Olar:
Qaraqalpaq tili, Rus tili, İnglis tili, Nemets tili, Yapon tili, Koreets tili, Arab, Qıtay, İspan, Fransuz, İtalyan tili ha’m Tu’rik tili.

So’zlikte 17 mın’g’a shamalas so’zlerdi o’z ishine qamtıydı. Bag’darlama interfeysi paydalanıwshılarg’a qolaylı ha’m tu’sinikli. Joba elimizdegi en’ iri jobalardın’ biri, sebebi bunnan aldınlarıda basqa bag’darlamashılar ta’repinen so’zlik bag’darlamaları islep shıg’ılg’an, biraq olardı ko’p tilge awdarıw mu’mkinshiligi az dewge boladı. Atalg’an bag’darlamanı islep shıg’ıwda obyektke bag’darlang’an Delphi tilinen paydalanılg’an.

Joba iyesi Nuratdin Reypnazarov NMPİ qasındag’ı №1 sanlı akademiyalıq liteseydin’ anıq-pa’nler bag’darın 2012 jılı tabıslı tamamladı. Ol akademiyalıq litseydi oqıp ju’rgen waqtınan baslap jan’a kompyuter bag’darlamaların du’ziwge qızıqtı. Tu’rli tan’lawlarg’a belsene qatnastı. Sonday-aq ol veb sayt islewgede qızıg’adı.
Ha’zirgi waqıtta Nuratdin o’z jobası u’stinde teren’ izlenbekte ha’m onı jetilistirmekte.

Nuratdin sıyaqlı kompyuterdi qaraqalpaqsha so’yletken jas bag’darlamashılar bar eken, elimizdegi informatsiya-kommunikatsiya texnologiyaları tarawı bunnanda joqarı jetiskenliklerge erisiwine ka’mil isenemiz.


B. Kalmuratov