Сәскеде таза қуда-қудағайының үйине ақлық болыў бәнеси менен Паршагүл кемпирди ертип келген Нәзийра кемпир, еплеп күнди батырды. Ол узақ жолдан шаршап, суўыққа тоңып, қара шайдың қумары тутып келген болса керек, күн батаман дегенше «илла» деп, аўызын ашпады.

Өтирик болмасын, Нәзийра кемпир қара шайды бир бастырып ишип алып болып, ақлық қызына:

-Шаўлық, жаўлық, деген,-шаўлықты әкел, көримлигин берип, түпәламын айтайық-деп, оған бир нәрселерди услатты. Соннан соң, таўық сорпасын ишип боламан дегенше кудасы менен болып, қудағайы менен болып, ашылысып, бир жөнли сөйлеспеди.

Тегис қараңғы түскен пайытта дәстурхан әтирапында отырған Нәзийра кемпир бир нәрседен шоршынғандай, бир көтерилип-басылып, қудасынан телефон сорады. Ораштың үйинде телефон жоқ дә, бирақ оның шаңарағындағылардың ҳәр биринде өзлериниң қол телефонлары бар.

Ораш кисесинен қол телефонын шығарып, қудағайының айтқан номерлерин терип, телефонды Нәзийра кемпирге узатты.

Кемпир үйиндеги баласы Камал менен асықпай турып, ҳал-жағдай сорасты. Қоңсы-қобаларын сорастырып, аўыл-елдиң аманлығын билди. Соңынан, баласы Камал менен узақ сөйлести:

-Бөке, (Нәзийра кемпир үлкен баласы Камалдың атын айталмағаннан соң «Бөке» дейди) бағана азанда таўықларға дән салып болып, жүўери қалтаның аўызын ашық таслап кетиппен. Барып өзиң көрип қайт, балалар кешки дәнин салып болып, қалтаның аўызын байлады ма екен?! Баласы Камал яқшы,-деп болып… еки, үш минуттан соң Нәзийра кемпир және сөз баслады.

-Бөке «сары қасқа» сыйыр толғатып жүр еди. Бүгин туўып қалыўы мүмкин, баспағы суўыққа тоңып өлип қалмасын… - Яқ, яқ мен сизлерге исенбеймен. Ҳәзир-ақ, қораны барып көрип қайт.

Және бираз ўақыттан соң Нәзийра кемпир гәпин даўам еттирип:

-Ҳә, Бөке еле жайма екен. Жәниўар ыңқылдап турған жоқ па екен, серледиң бе? –Бүгин түнде уйқылап қалма, ана туўған баспағы…-деп сөзин таўыспай-ақ, қудасының қол телефоны бес-алты мәртебе шүйкилдеп, тым-тырыс болды.

Нәзийра кемпир бираз тақатсызланып, қудағайы Сапаргүлдиң қол телефонын алды да, үйиниң номерлерин қайтадан терип, және сөйлесип баслады.

-Ҳә, Бөке, қапылғыр жаңағы телефон өшип қалды. Мына қудағайдың қол телефонынан шығып атырман. Айтпақшы, келин үйде ме-? Айт ана бүгинги саўып алған сүтлерин писирип болып, суўытып, кешеги емес, алдыңғы күнги қатықтан уйытқы салып уйытсын. Сол күнги уйытқы қоңсының уйтқысы еди. Дым мазалы екен. Балаларың таласып ишти,-деп болып, бираз үнсизликтен кейин Нәзийра кемпир және:

-Айтпақшы, келинди шақыр… Қора бетте дейсең бе?. Шақыр, айтатуғын гәпим бар еди.

-Ҳаў, келин «сары сараныў»ды саўып алдың ба? Теўип жибермеди ме жәниўар. Дым тентек. Артқы аяқларын тусап саўыў керек пе, билмедим. Ана қызыл, ресей таўық төледеги ящиктиң ишине мәйек туўатуғын еди, мәйегин алдыңыз ба? Алмаған болсаңыз пышық жеп кетпестен бурын Бөкеге айт ҳәзир-ақ, алып келсин. Мениң Шекер (Нәзийра кемпир кишкене ақлық қызын «Шекер» дейди) қызым не қылып атыр. Оған дийванға төсек салып бериң. Және жығылып қалмасын қараңқырап турың.

Келин кешке қандай аўқат таярладың? –Және мениң Қасымжаным аштан-аш жатып қал…..

Нәзийра кемпир қалған жағын айтпай-ақ, қудағайы Сапаргүлдиң де қол телефоны шүйкилдеп-шүйкилеп, тым-тырыс болды.

Соңынан Нәзийра кемпир Ораштың балалары менен қызларынан қол телефонын сорап еди, ҳеш қайсысы телефонын бергиси келмеди.

Себеби, Нәзийра кемпир қудасы Ораштың қол телефонында 15 минут, ал, қудағайы Сапаргүлдиң телефоны менен болса, саррас 23 минут сөйлескен еди.

Нәзийра кемпир Ораштың балаларының жақтырмағанын сезди ме, ақыр-ақыбетинде қудасы Камалға қарап:

-Қуда мениң ана жүктиң үстинде турған бәшпентимниң қалтасында қол телефонным бар. Соны-ақ, алып берши,-деп өзиниң қол телефоны менен үйине қайтадан шығып:

-Ал, Бөке, келинге айт бизлер бүгин қуданикинде болып, «қуда қәлесе» ертең азанда қайтамыз. Қуданың үйинде еки телефоннан басқа телефон жоқ екен. Соннан кейин, өзимниң телефоным менен-ақ, сөйлесип атырман. Хош онда, жақсы жатып турың,-деп сөзин жуўмақлап болып, қол телефонын қайтадан бәшпентиниң қалтасына салды. Соңынан, асықпай отырып қудасы Камалға қарап:

-Ал қуда. Ертең азанда мен ерте үйдиң ишлери менен сөйлесип, балалар менен келинлерге, ҳәр бирине өзлериниң жумысларын тапсырып, айтыўым керек. Сол ушын маған азанға шекем, қалай болмасын, саз еки қол телефонын таярлап қоймасаңыз болмайды. Мениң телефонымның центи аз еди,-деп, азанға буйыртпа берди де, басы дастуққа тийиўден, қурылдыны баслады.


Бийсенбай Бекмуратов.