Asıg’ıp ju’riwshi adamlar barlıq jumısların tez-tez pitkerip alsam eken dep oylaydı. Degen menen ko’p jag’daylarda olar o’z jumısların pitkerip u’lgermeydi. Shug’ıllanıp atırg’an isine onsha itibar bermey, keyingi isi tuwralı oylanıp otıradı… Bunday jag’daylar sizge tanıspa? Onday bolsa sabırlı bolın’!

Asıg’ıp ju’riwshi adamlar: Uyqıdan tura sala asıg’ıp juwırıp ketedi. Azang’ı shaydı ishken ku’nleride sanawlı. Jumısta oyların jıynay almay, islewge tiyis isleri haqqında oylanadı. Tu’stegi jıynalısqa erte tan’nan tayarlanıp, al oyları ha’zirgi jumıstı islewge zawıq bermeydi. Al jıynalısta dosları menen keshki otırıspaq haqqında oylanıp, onda da ju’da belsendi bolmaydı.

Basın’ızdag’ı rejelerdin’ ha’r jaqqa shashılıp ketiwi, keleshek haqqındag’ı uwayımlar islerin’izdi pitkeriwge, durıs demalıwg’a mu’mkinshilik bermeydi.

Bunday uwayımlar menen qa’ytip gu’resiwge boladı?

Psixolog qa’niygelerdin’ aytıwı boyınsha, bunday zamanago’y awırıwdı tek tınıshlıq jen’e aladı.

• “Bos” waqıt.
Ku’ndelikli belgili bir waqıttı hesh rejelestirmey, bos qaldırıw. Usı waqıtta oyımızg’a kelgen na’rse menen shug’ıllanıw. Da’slep bul waqıt qurı o’tken sıyaqlı bolıp ko’riniwi mu’mkin. Degen menen (waqıttın’ o’tiwi menen) biz bul waqıttı o’zimizge jaqın is penen shug’ıllanıw arqalı o’tkere baslaymız. Dalada qıdırıw, su’wret salıw, asıqqan qala o’mirin sırttan baqlaw. En’ baslı maqset – waqıttan tıs bolıp u’yreniw.

• Tınıshlıqtı saqlaw.
Jumıs o’nimdarlı bolıwı ushın nawshnik penen qosıq esitpey, tınısh bo’lmede otırıp, artıqsha sırtqı ta’sir etiwshi dawıslardan qorg’anıw.

• Sırtqı ortalıqtın’ jag’ımsız ta’sirinen qorg’anıw.
Kompyuterler, televizorlar, radio ku’ni boyı kewlimizdi o’zine tartadı. Olardan shamalı bolsada qorg’anıw. Asıqpay otırıp awqatlanıw yamasa doslarımız benen ju’zbe-ju’z uzaq waqıt so’ylesip otırıw – shıdamsızlıqtı jen’e alıwg’a ko’meklesedi.

• Salmaqlı, uqıplı bolıwg’a tırısıw.
Asıqqan adamlar barqulla bir na’rseni qulatıp, to’gip, sındırıp ju’redi. “Asıqqan – shaytannın’ isi” degen naqıl biykar aytılmag’an. İs ha’reketlerimizge kewil bo’liw. Ha’r is-ha’reketimiz oylanıp islengen, aldın-ala rejelestirilgen, sırttan qarag’anda sulıw ko’rinetug’ınınday bolsın.

• Sport penen shug’ıllanıw.
Dem alıwdan baslap, ku’ndelikli kalendardı retlestiriw.

• İtibarlı bolıw.
Asıg’ıw tap u’lken ma’sele de emes, onın’ baslı aqıbeti – itibarsızlıq. Basqa zatlardı oylap otırg’anda, otırg’an jerin’izdegi zatlarg’a kewildi jeterli bo’lmeysiz. Qasın’ızda ne dep atırg’anın, ha’tte kim bolg’anında umıtıp ketetug’ın jag’daylar da boladı. Endigiden bılay itibarlı bolıwg’a tırısın’. Sa’wbettin’ ha’r so’zine itibar berip, este saqlap otırın’. Ha’r mayda shu’yde na’rselerdi de baqlap otırıwg’a tırısın’.

•Waqıtqa boysınıp qalmaw.
Mu’mkinshilik bolsa, ku’ni boyı saatsız ju’rip ko’rin’. Jumısların’ızdı tolıg’ı menen pitirip, hesh asıqpan’. Da’slebinde ko’p na’rse u’lgermesen’izde, son’ınan waqıt – tek adamnın’ oyındag’ı abstrakt zat ekenin tu’sinesiz.

Shıdamsızlıq qa’siyeti oqıytug’ın, jumıs isleytug’ın, jumısları ko’p adamlardın’ basınan o’tiwi mu’mkin. En’ baslısı waqıttın’ tutqınında qalıp qoymay, o’z waqtın’ızdın’ xojayını bolın’.