2014-жыл 8-июнь күни пайтахтымыздағы «Туран» орайлық стадионында Нөкистиң Арал футбол командасы басшылары ҳәм футболшылары, және қарақалпақ футболының ветеранлары қатнасыўында Арал командасының жанкүйерлери менен ушырасыў болып өтти. Ушырысыўды Қарақалпақстан футбол федерациясы президенти Владимир Назаров кирис сөз бенен ашып берди. Ол Арал командасының, улыўма қарақалпақ футболының тарийхы ҳаққында азы-кем мағлыўмат берип өтти. Ол өз сөзинде қарақалпақ футболы 1994-жылғы Азия ойынлары чемпионы Бердақ Алланиязов, Өзбекстан чемпионы ҳәм Өзбекстан кубогы ийеси, Азия чемпионлар лигасының бронза медалы ийеси Нағметулла Қутыбаев, Азия лигасы кубогының жеңимпазы Азамат Алланиязов ҳәм тағы басқа да талантларды жетистирип шығарғанлығын мақтаныш пенен атап өтти.

Соң ушырасыўдың тийкарғы бөлимине өтилди. Ушырасыўдың тийкарғы бөлими төмендегише избе-изликте болып өтти:

1. Жанкүйерлер менен сораў-жуўап.
Команда жанкүйерлери клуб басшыларына ҳәм футболшыларға қызықтырған сораўларын берди. Сораўлар тийкарынан Арал футбол клубының финанслық жағдайы ҳаққында болды. Командамыз бас тренери Нағметулла Қутыбаев бул мәўсимде команданың финанслық тәмийинлениўи өткен жыллардағыдан сәл жақсылаў екенлигин айтып өтти. Ал Қарақалпақстан футбол федерациясы президенти Владимир Назаров бул мәўсимде клуб 44 кәрхана менен қәўендерлик шәртнамасын дүзгенлигин ҳәм бул кәрханалар усы мәўсим ушын клуб есабына 760 миллион муғдарда қаржы өткериў миннетлемесин мойнына алғанын тастыйықлады. Владимир Назаровтың айтыўынша усы күнге шекем бул кәрханалар тәрепинен клуб есабына 110 миллион сўм өткерилген болып, қалған пул муғдарының да өз ўақтында өткерилиўин тәмийинлеў ушын федерация тәрепинен клуб басшылары ҳәм кәрхана басшы ҳәм жумысшылары менен ушырасыўлар шөлкемлестирилип атыр.

2. Жанкүйерлердиң үй ҳәм миймандағы ойынларда өзлерин тутыў қағыйдалары
Бул ҳаққында Қарақалпақстан ишки ислер бөлиминиң ўәкили сөз етип, Өзбекстан спорт ҳәм мәденият ислери министрлигиниң спорт жарысларында жанкүйерлердиң өзлерин тутыў қағыйдалары менен таныстырды.

3. Арал футбол клубының фан клубын шөлкемлестириў мәселеси қарап өтилди.
Владимир Назаров усы ушырасыўдың өзинде өзегин жаратыў кереклигин ҳәм бул өзекти қарақалпақ футболының раўажланыўын шын жүректен қәлейтуғын, бул жолда аянбай хызмет етиўге таяр инсанлар қураў кереклигин айтып өтти. Бул өзек командамыздың мыңлап жанкүйерлерин бириктирип, командамызды қоллап-қуўатлаўды күшейтиўи уйғарылған. Жанкүйерлердиң усыныслары ҳәм өз қәлеўлери менен 13 адамнан ибарат Арал футбол клубының фан-клуб өзеги дүзилди. Фан-клуб искерлигине байланыслы мәселелерди қарап өтиў ушын Қарақалпақстан футбол федерациясы кеңеси Арал фан-клубының ўақтынша кеңсеси етип бекитилди.

Бул ушырасыў Арал командасының, улыўма қарақалпақ футболының раўажланыўына тәсир ететуғындай ҳәрекетти қәлиплестиреди деп ойлайман. Футболға, соның ишинде қарақалпақ футболына бийпарқ болмаған инсанларды усы ҳәрекеттиң ағзасы болып, командамызды белсенди түрде қоллап қуўатлаўға шақыраман.


Айбек Қудияров.