Ёшлар телеканалының Имкон шоу телебағдарламасы бүгинги күнде көплеген тамашагөйлерине ийе. Дәслебинде эстрада ҳәм кино жулдызлары қатнасыўында өткерилген теле ойын бүгинги күнге келип жаслар қатнасыўында шөлкемлестирилмекте. Имкон шоу теле-ойыны бир неше айдан берли ўәлаятларда өткерилмекте. Мине енди бул телебағдарлама қарақалпақ жаслары қатнасыўында Нөкис қаласында өткериледи. 28-октябрь күни Нөкис қаласында теле-ойынға қатнасыўшылар ушын кастинг шөлкемлестирилди.

Имкон шоу телебағдарламасының алып барыўшысы Аҳрол Иноятов ҳәмде Ёшлар телеканалының режиссёры ҳәм операторлары тәрепинен шөлкемлестирилген бул кастинге 200 ге шамалас қарақалпақ жаслары қатнасты. Кастинг қатнасыўшыларының дерлик ҳәммеси зийрек жаслар десек қәтелеспеймиз. Кастинге Ниҳол ҳәм Зулфия атындағы мәмлекетлик сыйлықтың лауреатлары, Ташаббус таңлаўының жеңимпазлары, мәмлекетлик стипендиянтлар жеңимпазлары, түрли таңлаўлар жеңимпазлары, Азия ҳәм жәҳән чемпионлары, жас дөретиўшилер, бақсы ҳәм жыраўлар, қосықшы жаслар, қуўнақлар ҳәм зийреклер таңлаўы жеңимпазларын, жас фермерлер, исбилерменлер, дизайнерлер қатнасты.

Қатнасыўшылар сахна төринде өзлерин кеўилли түрде таныстырды. Өзлерине арналған қосықлар оқылды, ҳәзиллер айтылды, монологлар актёрлық шеберлик пенен оқылды. Ниҳол мәмлекетлик сыйлығының лауреаты Гүлназ Өтепова “Айдынлар” қосығын атқарып берген болса, жас жыраў Саламат Аяпов ғобыз бенен дәстаннан үзинди келтирди, бақсылар дуўтар шертип қосық айтты.

Өзбекстан мәмлекетлик көркем-өнер ҳәм мәденият институтының Нөкис филиалы студенти Бегжанов Өсербай ҳәзил түринде “Раўшан” атлы қосығын оқып берди ҳәм муҳаббат темасындағы “Сулыў қыз” атлы китабының баспадан шыққанында атап өтти. Залда отырған жорасы туўралы мақтап айтып атырған ўақытта, Теле-ойын алып барыўшысы Аҳрол Иноятов тек өзиң ҳаққында айт деп күлимсиреди. Соң Өсербайдың жорасы Алламуратов Ғайрат сахнаға шықты. Ол кастинге қатнасыў нийетим жоқ еди жаңа ғана жорам мен ҳаққында айтқансын шығыўды мақул көрдим деди ҳәм ҳәзил аралас өзин таныстырды. Төмендеги Т. Жумамуратовтың қосық қатарлары менен сөзин жуўмақлады.

Сен жәннетсең Ўатаным,
Сен жәннетсең Ўатаным,
Исенбеймен басқа жәннет бар десе,
Топырағы пахта өскен даламның,
Көкке өскен Токиодан артықдур,
Бир қысым Нью-Йорк та жүргенше,
Жүрейикта Шахаманда шалхып бир.

Бир сөз бенен айтқанда ҳәтте кастинг процессиниң өзи телебағдарламадан қалыспайтуғын үлкен шоуға айланды.

Кастинг соңында 16 қатнасыўшы Имкон шоу теле-ойынына қатнасыўға жоллама алды ҳәм Ёшлар телеканалы арқалы теле-ойын жақын арада эфирге бериледи.


Калмуратов Б, Халықбаев Ж, Примбетов А.
www.megaline.uz ушын арнаўлы.