2014 jıldın’ “altın top” iyesi, madritlik “real”dın’ topmergeni Krishtianu Ronaldu 600-oyınında maydannan quwıldı. Futbolshı İspaniya chempionatının’ 20-turındag’ı “korollik klubtın’” “Kordova” komandasına qarsı ushırasıwında oyın qag’ıydasın qopal tu’rde buzdı.

Portugaliyalıq hu’jimshi “Real” qatarında besinshi ret maydannan ketti.Ol usıg’an shekem “Almeriya”, “Malaga”, “Atletiko” ha’m “Atletik” komandalarına qarsı o’tkerilgen ushırasıwlarda qızıl qag’az benen “marapatlang’an” edi. Al “Manchester Yunayted” komandasında oynag’anda 3 ret maydannan oyın waqtında erte shıg’ıwına ma’jbu’r bolg’an.

Madritlik klubtın’ sırtqı maydanındag’ı “Kordovag’a” qarsı oyınında Krishtianu Ronaldu 83-shi minutta maydannan quwıldı. Ol da’slep qorg’awshı Edimardtın’ ayag’ın shalıp jıqsa, keyin Xose Kresponı betinen qag’ıp, keri shegindirgen. Futbolshının’ sportqa ta’n emes ha’reketi ushın bas to’reshi Alexandro Ernandes birden qızıl qag’az ko’rsetti.

Krishtianu Ronaldunın’ endi qansha waqıt oyıng’a qatnaspawı aldag’ı waqıtta belgili boladı. İspaniyalıq “AS” baspaso’zi futbolshını u’sh oyıng’a qatnaspaydı dep boljasa, “sport.es” saytı 12 oyıng’a shekem jazalanıwı mu’mkin dep xabarladı. Al futbolshının’ o’zi bolsa, qa’teligi ushın oyınshılar menen ıqlasbentlerden keshirim soradı.

Esletip o’temiz, match 2:1 esabı menen “Real” komandasının’ jen’isi menen tamamlandı.


Paydalanılg’an derekler: espnfc.com, sport.es