Paytaxtımızdag’ı eskek esiw boyınsha qa’nigelestirilgen Olimpiya rezervleri jas o’spirimler mektebi sportqa qızıg’ıwshılardı ken’ gu’zarg’a jetelewshi ta’rbiya orayının’ biri. Bulay dewimizdin’ sebebi bul mektep ta’rbiyalanıwshıları son’g’ı u’sh jılda O’zbekstan chempionatları, birinshilikleri, kubok bellesiwleri ha’m xalıq aralıq regatalarda 81 altın, 162 gu’mis, 106 qola, ja’mi 349 medaldı jen’ip aldı, 11 sportshı O’zbekstan sport sheberi da’rejesin orınlag’an bolsa, 2 sportshı Uzaqbaev A’biwba’kir, Ha’miydullaev Ernazar xalıq aralıq da’rejedegi sport da’rejesin orınlaw baxtına miyassar boldı.

A’lbette bul eki azamatımızdın’ erisken na’tiyjesi pu’tkil mektep ja’ma’a’tinin’ u’lken quwanıshına aylandı. Sebebi, akademiyalıq eskek esiw boyınsha Aziya oyınlarınan ma’mleketimizge tung’ısh medallardı ina’m etken Bahadir Da’wletyarov penen Ruslan Bichurinnen song’ı, yag’nıy aradan on jıldan aslam waqıt o’tkennen keyingi mektebimizden shıqqan xalıq aralıq da’rejedegi sport sheberleri edi. A’. Uzaqbaev penen E. Ha’midullaev İtaliyada, Frantsiyada o’tkerilgen Ja’ha’n kuboklarında ta’jiriybelerin arttırıp, 2009-jılı Rossiyada o’tkerilgen “U’lken Moskva regatası” xalıq aralıq turnirinen ha’r biri qos altın menen oraldı. 2010-jılı Singapurda o’tkerilgen Aziya kubogı bellesiwinde A’. Uzaqbaev ten’lesleri arasında da, eresekler arasında da finish sızıg’ın ekinshi bolıp kesip o’tip, qos gu’mis medaldı qolg’a kirgizdi ha’m Prezidentimizdin’ na’zerine tu’sip, qayıq penen sıylıqlanıw baxtına miyasar boldı.

Al, 2011-jılg’ı Singapurda o’tkerilgen Aziya kubogı bellesiwinde A’. Uzaqbaev Prezidentimizge bergen wa’desi u’stinen shıg’ıp, o’spirimler arasında altın medal iyesine aylansa, E. Ha’miydullaev ten’lesleri ha’m eresekler arasında ten’siz ekenin da’liyllep, qos altın medaldı qolg’a kirgizdi. Qızlar arasında Aysara Baylepesova menen Rawshan Saparbaevalar da bos kelmedi ha’r biri qola medaldan jen’ip aldı.

Sonday-aq Qubla Koreyada o’tkerilgen Aziya chempionatında A’. Uzaqbaev penen E. Ha’miydullaevtın’ ha’r biri 1 altın, 1 gu’mis medal iyesine aynaldı. Usı na’tiyjeleri ushın olar O’zbekstan Respublikası Ma’deniyat ha’m sport isleri ministrligi ta’repinen xalıq aralıq da’rejedegi sport sheberi da’rejesin beriwge ılayıq dep taptı. Bul tabıslar aytar awızg’a an’sattay ko’ringeni menen olardın’ trenerleri M. Mambetnazarov penen B. Da’wletyarovlardın’ ko’p jıllıq tınımsız ha’m na’tiyjeli miynetinin’ jemisi, ag’a trener N. Baylepesov penen mektep direktorı O’zbekstang’a miyneti singen trener B. Yu. Paxomovlardın’ sheber sho’lkemlestiriwshiligi na’tiyjesi.

Mektebimizdin’ ja’ne ayta keterlik tabıslarının’ biri son’g’ı u’sh jılda 9 sportshımız O’zbekstan chempionatlarındag’ı jen’isi ushın test sınaqlarısız joqarı oqıw ornı studenti boldı.

Men eskek esiw sportına 2007-jılı keldim. Usı ku’nge shekem O’zbekstan chempionatları, birinshilikleri ha’m kubok bellesiwlerinde 12 ma’rete jen’impazlıqtı, 21 ma’rte sıylıqlı orınlardı qolg’a kirgizip, O’zbekstan sport sheberi da’rejesin orınladım. O’zbekstan saylandı komandası quramında İtaliyada o’tkerilgen Ja’ha’n kubogı bellesiwine qatnasıwg’a miyasar boldım.

Burın ba’rimiz Viktor Kasheev, Vladimir Grishenko, Bahadır Da’wletyarov, Ruslan Bichurin sıyaqlı xalıq aralıq da’rejedegi sport sheberlerindey bolıwdı ha’wes etsek, endi bizin’ qatarımızdan da usınday xalıq aralıq da’rejedegi sport sheberlerinin’ o’sip jetilisiwi biz ushın u’lken maqtanıshqa, keleshek ushın ha’wes etkendey tulg’alarg’a aylandı.

Mektebimizde elede kelesheginen u’mit ku’ttiretug’ın jaslarımız ko’p, olar a’lle qashshan Qaraqalpaqstan birinshiliklerine ha’m ma’mleket ko’lemindegi bellesiwlerde o’zin ko’rsete basladı.

Usı jaslar ishinen de A’. Uzaqbaev penen E. Ha’miydullaev sıyaqlı keleshek jaslar ha’wes etkendey sportshılar o’sip jetilisedi degen niyettemiz.


Da’mexan QAIPOVA,
QMU studenti, O’zbekstan sport sheberi.
Ustaz jolı gazetasınan.