Da’slepki qısqı Olimpiada oyınları 1924 jılı Frantsiyanın’ Shamoni qalasında o’tkerilip, og’an 16 ma’mleketten 280 sportshı qatnasqan edi. Qatnasıwshılar sporttın’ to’rt tu’rinen, 14 bag’darlama boyınsha jarıstı. Sonnan keyin bul qısqı Olimpiada oyınları ha’r to’rt jılda bir ret o’tkerilip kelmekte.

Sochi XXII qısqı olimpiada oyınlarının’ ashılıw ma’resimi saltanatlı tu’rde usı jıldın’ 7 fevral sa’nesi Moskva waqtı menen 20:14 te baslandı. Bul “2014 jıl” degen ma’nisti an’latsa kerek. Bas qa’harman retinde Lyuba atlı qızdın’ rus a’lippesindegi ha’riplerdi izbe-izlikte aytıp, Rossiya xalqının’ tariyxındag’ı jan’alıqlardı atap o’tti. Qısqa metrajlı showdan keyin olimpiada logotipi nurın shashtı. “Fisht” maydanına Rossiya Federatsiyasının’ prezidenti Vladimir Putin shaqırılg’annan son’, Rossiyanın’ gimni aytıldı.Gimnnen son’ Olimpiada alawının’ estafetası du’nyanın’ to’rt ta’repin aralag’an ma’writinen ko’rinisler usınıldı.

Da’slep “Fisht” stadionının’ orayına Olimpiada watanı esaplang’an grek xalqının’ wa’killeri shıqtı. Son’ keyingi ma’mleketler a’lippe ta’rtibi boyınsha shıqtı.

Ma’mleketimiz bayrag’ın taw shan’g’ısı sportı boyınsha O’zbekstan saylandı komandası ag’zası, bir qatar ataqlı jarıslar jen’impazı, xalqaralıq taypadag’ı sport ustası Kseniya Grigoryeva ko’terip shıqtı. Ta’jiriybeli sportshımız 2010 jılı Kanadanın’ Vankuber qalasında o’tkerilgen XXI qısqı Olimpiada oyınlarında da elimizdin’ atag’ın qorg’ag’an.

Sportshılardın’ ıqlasbentler aldında ju’rip o’tiw saltanatı tamamlang’annan son’, Olimpiadanın’ talismanı tanıstırıldı.



Son’ Rossiya xalqının’ tariyxı bayan etilgen qısqa metrajlı film ha’m show usınıldı. Ashılıw saltanatının’ show basqıshı tamamlang’annan son’ Sochi Olimpiadasının’ sho’lkemlestiriw komitetinin’ prezidenti Dimitriy Chernıshenko shıg’ıp so’ylep, ol o’z so’zinde sportshılardı qutlıqladı. Son’ xalqaralıq Olimpiada komitetinin’ baslıg’ı Tomas Bax so’zge shıg’ıp, barlıq sportshılarg’a a’wmet tiledi. Al Rossiya prezidenti Vladimir Putin Sochi XXII qısqı Olimpiada oyınların ashıq dep ja’riyaladı.

Olimpiadanın’ son’g’ı ma’writine shekem Sochi alawın uslaytug’ın sportshılardın’ atı belgisiz edi. Son’g’ı ma’writte XXII Olimpiadanın’ alawın Rossiya qısqı sport tu’rinin’ sportshısı İrina Rodnina ha’m Vladislav Tretyak alıstırdı.

Solay etip, pu’tkil du’nya to’rt jıl ku’tken Sochi qısqı Olimpiada oyınlarının’ alawıda jag’ıldı. Bul Olimpiada oyınlarında Watanımız sportshılarına a’wmet tilep qalamız!


su’wretler: twitter.com