Инсан өмириндеги ең куўанышлы күни бул – оның бахыт тойы саналады. Бахыттың белгиси сыпатында келин-күйеў бири-бирине неке жүзигин тағады. Бул барлық миллетлерде ушырасады. Хош, неке жүзиги қашаннан бери пайдаланылып келинбекте?

Тарийхый мағлыўматларға қарағанда, 1215 –жылда Рим папасы Иннокентий-III жас келин-күйеўлерди некеден өткизер екен, олардың өзара некесиниң беккемлиги үлгиси сыпатында жүзик тағыў кешесин өткериўды белгиледи. Яғный, күйеў келинди өз некесине алар екен, ата-анасына келешекте қызын өз қарамағына алыўға, ғамхорлық қылыўға, оны қәдирлеўге, келин болса өмириниң ақырына шекем өмир жолдасына опадар болыўга ўәде берген. Бунда жүзик әпуайы металдан болып, 1477-жылға дейин усы көринисте даўам еткен. Усы жылы Австрия герцоги Максимилиан Франция маликасы Марияға үйлениў алдында жаңа көринистеги жүзиклердиң жасалыўын енгизди. Ол маликаға «М» ҳәриби түсирилген қымбат баҳа брилиант таслы тилла жүзик саўға қылды.



Жүзик неге атамасыз бармаққа тағылыўы ҳаққында төмендегише пикирлер бар. Яғный, «мухаббат» қан тамыры есапланған вена әне сол атамасыз бармақтан өтип, туўры жүрекке барар екен. Рус халқынын әдетине көре, неке жүзиги оң қол бармағына, Европа ҳәм Америка мәмлекетлеринде болса, шеп қол бармағына тағылады.

Орта әсирлерге келип, атастырыў әдет түсине айланды. Дәстүрге көре, бунда күйеў келинниң белгили екенлигин билдириў мақсетинде шырайлы жўзик усынады. Бул дәстүр ҳәзирги күнде де бар болып, неке жүзиклери болса заманға сай раўажланып, өзгеше түске енип бармақта.

Демек, өмирмиз даўамында жолдас болатуғын неке жүзиклери қанша әсирлер ассада жоғалмаған керисинше, ол турмысымызға терең сиңип, муҳаббаттың белгиси сыпатында ардақланбақта.


Баспа сөз материаллары тыйкарында:
Megaline.uz ушын арнаўлы
Гүлжаҳан Сейтназарова таярлады.