Ташкент информациялық технологиялары университетиниң программалық инжиниринг ҳәм телекоммуникация технологиялары факультетлери тәрепинен усы жылдың 17-18 март күнлери Ташкент қаласында программалық ҳәм техник исленбелер көргизбеси шөлкемлестирилди.

Университеттиң зийрек студентлери, магистрантлар ҳәмде профессор оқытыўшыларының программалық ҳәм техник өнимлерин өз ишине қамтыған иләжди өткериўге Өзбекистан Республикасы информациялық технологиялары ҳәм коммуникацияларды раўажландырыў министрлиги, “Өзбектелеком” АК, “Өзбекистан почтасы” АЖ ҳәм “UZINFOCOM” орайы қәўендер болды ҳәм қоллап қуўатлады.

Информациялық технологиялардың раўажланыўы, олардың программалық тәмийнаты ҳәм миллий информация ресурслары менен байытыў, интерактив хызмет түрлерин көбейтиў, өз-ара коммуникация мәселелерин шешиў, аймақлық ҳәм халқаралық коммуникация тармақларына жалғаныў ҳәмде олардан пайдаланыўды шөлкемлестириў процесси тараў қәнигелери алдына бир қатар ўазыйпаларды қоймақта. Атап өтсек, бул процесстен Ташкент информациялық технологиялары университети алымлары ҳәм студентлери ҳәм шетте емес.

Университетте халқара стандартлар талапларына жуўап беретуғын жоқары тәжирийбели қәнигелерди таярлаў мақсетинде компьютер инжиниринг, программалық инжиниринг ҳәм телекоммуникация технологиялары сыяқлы жаңа билимлендириў бағдарлары ашылған болып, ҳәзирги күнде бул тараўларға бағдарланған студентлер саны 4 мыңнан аслам.

Усы көргизбе де жоқарыдағы ис-илажлардың логикалық даўамы болып, университет ҳәм оның аймақлық филиаллары студентлериниң белсендилигин асырыў, илимий искерликке бағдарлаў, олардың интеллектуал потенциялын раўажландырыў ҳәмде инталы жасларды хошаметлеў сыяқлы мақсетлерди өз ишине қамтыйды. Бир сөз бенен айтқанда, ҳәр бир студент ушын имканиятлар майданы.

Мине усы көргизбеге қойылған исленбелердиң айырымлары менен Megaline.uz арқалы таныстырыўды мақул көрдик:

Программаның аты: “Топты басқарыў ойыны”
Программа жаратылған орталық: Java Android SDK.
Авторы: Шарипов Ш. 218-11 топар студенти.
Бул программа Android платформасында, киши жастағы балаларға арналған. Программа тийкарынан 3D графикасында ислейди. Оның тийкарғы мақсети мобил қурылманың функционал имканиятынан пайдаланып, топты белгиленген мәнзилге алып барыў талап етиледи.

Программаның аты: “Visit Kashkadarya”
Программа жаратылған орталық: Objective C.
Платформа: iOS
Авторы: Тоғаев Ш. 201-топар студенти.
Бул программа Қашқадарья ўәлаятының тарийхый орынлары ҳаққында мағлыўмат береди. Яғный туристлик искерликти асырыў ушын ислеп шығылған.

Қурылманың аты: “Knock detector”
Автор: Парманов И. 1-курс магистрант.
Бул қурылма сенсор арқалы түрли объектлерди басқарыў, ҳәрекетлендириў ушын арналған. Объектлерди басқарыў ҳәм ҳәрекетлендириў ушын Arduino аппарат платформасы ҳәм Servo Motor ҳәрекетлендириў аппаратынан пайдаланылған. Ал микроконтроллер ушын ҳәрекетлерди басқарыўға арналған арнаўлы программалық код жазылған болып, ол плата ядына жайластырылған. Программа имканиятларына қарап усы қурылма аралықтан жиберилген даўысқа сәйкес белгиленген ўазыйпаны орынлайды ҳәм объектлерди ҳәрекетлендиреди.

Қурылманың аты: “ТАТУ РОБОТ”
Автор: Парманов И. 1-курс магистрант.
“ТАТУ РОБОТ” қурылмасы адым менен жүриў, бурылыў ҳәм сөйлеў сыяқлы ўазыйпаларды орынлайды. Робот Wi-Fi арқалы аралықтан басқарылады, сондай-ақ оған талап тийкарында қосымша функциялар киритилиўи мүмкин.
Роботтың қурамы:
- Программаланыўшы Arduino аппарат платформасы;
- Сезиўши Servo Motor қурылмасы;
- Ҳәрекетшең мотор;
- Wi-Fi арқалы басқарыў модули;
- Android платформасы ушын программалық тәмийнат.

Қурылманың аты: “Аралықтан басқарылыўшы лабиринт қурылмасы”
Автор: Бегманов Ш. 4-курс студенти.
Бул қурылма мобил телефон яки компьютер арқалы аралықтан басқарылып, ондағы шарды лабиринт жоллары бойынша ҳәрекетлендирип керекли мәнзил яки есикке алып барыў керек.
Исленбени жаратыўда пайдаланылған программаластырыў тиллери ҳәм қураллар:
- С программаластырыў тили (Ардуино платформасы ушын);
- С# программаластырыў тили (компьютер ушын);
- Android программаластырыў орталығы (Мобил телефон ушын);
- Программаланыўшы Ардуино платформасы.

ТИТУ спорт сарайында өткерилген көргизбе орынлары программалық өнимлерге толы болды, әсиресе студент жаслар тәрепинен исленген робот қурылмалары көпшиликтиң дыққатын өзине аўдарды. Олардың биреўи адам келбетинде болып жыйналғанларға сәлем берсе, ал тағы биреўлери түрли ҳайўанлар келбетинде ҳәрекетленбекте.

Программалық ҳәм техник исленбелер көргизбесине қатнасқанлар ушын 4 түрли номинация белгиленген болып, илаж жуўмағында, “Ең жақсы мобил қолланба”, “Ең жақсы веб қолланба”, “Ең жақсы Windows қолланба” ҳәм “Ең жақсы техник исленбе” авторлары шөлкемлестириўшилер тәрепинен арнаўлы сертификат ҳәм қымбат баҳалы саўғалар менен сыйлықланды.

Еслетип өтемиз бундай көргизбе, усы жылдың 9-апрел сәнесинде Нөкис қаласындағы Ташкент информациялық технологиялар университети Нөкис филиалында да өткериледи.


Калмуратов Б,
Ташкент қ, www.megaline.uz ушын арнаўлы.