“Aydın” intellektual turniri “Kamolot” JJH A’jiniyaz atındag’ı No’kis Ma’mleketlik Pedogogikalıq Institutı baslang’ısh sho’lkemi janında du’zilgen “Ziyalı jaslar” intellektual klubı ta’repinen sho’lkemlestirilip kiyatır. Turnirden maqset – jaslardın’ waqtın u’nemli o’tkeriwge ja’rdemlesiw, olardın’ bilimlerin asırıw, jas a’wladtı Watansu’yiwshilik ruwxında ta’rbiyalaw.

“Aydın” so’zi qaraqalpaq tilinde “ashıqlıq”, “jaqtı jer”, “tuwrı jol” degen ma’nislerdi bildiredi. “Aydın” turniri de jaslardı bilimler nurı taman baslawshı tuwrı jol wazıypasın atqarıwı kerek.

To’mende turnirdin’ ustavı menen tanısıwın’ızg’a boladı:

I. Turnir ulıwma 7 turdan iba’rat bolıp, og’an Qaraqalpaqstan Respublikası boyınsha joqarı ha’m orta arnawlı oqıw orınları komandaları ha’m basqa da qa’lewshi komandalar qatnasıwına boladı.

II. Ha’r bir komanda 6 adamnan iba’rat bolıp, komanda ag’zaları birdey formada bolıwı talap etiledi. Eger komanda bul ta’rtipke boysınbasa ja’riyma 5 ball menen jazalanadı.

III. Ha’r bir turda 20 soraw oynalıp, oylaw ushın ha’r bir soraw ushın 1 minut waqıt beriledi. Waqıt bolg’annan keyin 10 g’a shekem sanalıp, sol waqıtqa shekem komandalar juwapların jazba tu’rde qag’azg’a tu’sirip, juwap betlerin ko’terip u’lgeriwi kerek. Waqıtqa u’lgermegen komandalardın’ juwap betleri qabıl etilmeydi.

IV. Sorawlar tu’rli temalarg’a arnalg’an bolıp, ko’rgizbeli ha’m sandıqshalı sorawlar oynaladı. Onınshı ha’m jigirmalanshı sorawlarda duplet sorawları oynalıp, onda eki sorawdan, oylaw ushın 30 sekundtan beriledi. Eger komanda duplet sorawlarının’ birewin tapqan 1 ball, ekewin de tapsa 3 ball beriledi.

V. Qatnasıwshı komandalar oyın waqtında telefonların o’shirip qoyıwı yamasa “dawıssız” rejimge qoyıwı, oylasıqlar waqtında qasındag’ı komandalarg’a kesent bermewi, baslawshı ha’m basqa da sho’lkemlestiriwshi ag’zalarg’a hu’rmet saqlawı talap etiledi.

VI. Eger komandada qaysıdur sheshim boyınsha apelyatsiya bolsa, ha’mme sorawlar oqıp bolıng’annan keyin g’ana xabarlasıwına boladı. Oyın waqtında hesh bir komandanın’ apelyatsiyası ko’rip shıg’ılmaydı.

VII. 2 turdan qaldırg’an komandalar turnirden shıg’arıp jiberiledi.



Turnir sho’lkemlestiriwshileri:
Bekmuratov Baxtiyar, A’jiniyaz atındag’ı NMPI ruwıy-ag’artıwshılıq isleri boyınsha prorektor xatkeri;
Mamutov Marat, A’jiniyaz atındag’ı NMPI magistratura bo’limi I basqısh magistrantı.