Қыял еткен арзыўларың әрман болса,
Жас кеўилиң ҳәсиретлерге толған болса,
Сен исенген ҳақыйқат-ол жалған болса,
Өтинемен, көзлериң жас төкпесин.
Өмириң ҳеш көз жас пенен өтпесин.

Жас кеўилиң жалғызлықтан адасқанда,
Ойланбастан туўры жолдан алжасқанда,
Ярың сени өзге ярға алмасқанда,
Өтинемен, көзлериң жас төкпесин.
Өмириң ҳеш көз жас пенен өтпесин.

Сениң бахытыңды өзге алған болса,
Өзгелерден кеўилиң суўып қалған болса,
Сениң ҳәсиретлериң артып барған болса,
Өтинемен, көзлериң жас төкпесин.
Өмириң ҳеш көз жас пенен өтпесин.

Сабырыңның кеселери толып кетсе,
Саған өмир әдәлациз болып кетсе,
Махсетлериң ерисилмей қалып кетсе,
Өтинемен, көзлериң жас төкпесин.
Өмириң ҳеш көз жас пенен өтпесин.

Жақынларың жүзин бурып кете жақта,
Исенгениң саған сумлық ете жақта,
Излериңнен қайғы қуўып жете жақта,
Өтинемен, көзлериң жас төкпесин.
Өмириң ҳеш көз жас пенен өтпесин.

Өмириңде таўып кетсең шыннан бахыт,
Әрманыңда болмас еди оннан артық,
Мәңги бахыт кемесинде жүрсең шалқып,
Көзлериңнен қуўанышлы жаслар ақсын!
Жүзлериңде қуўаныштан күлип бақсын!


Бийбисара Худайназарова.