“Бүгин түске ҳәм кешке қандай аўқат таярлайман?” – деў ҳаял-қызлардың күнделикли баслы сораўы шығар. Гейде не таярлайтуғынымыз ҳаққында бас қатырып, бир нәрселерди қуўырамыз. Яки бар менен базар қылып, үйдеги бар затлардан қандайда бир тағам таярлап қоямыз. Ал бүгин биз бенен бирге мына тағамды таярлап көриўиңизге болады.

Қурамы:

Картошка — 5-6 дана,
Фарш – 500 гр,
Гешир – 2 дана,
Пияз – 1-2 дана,
Мәйек – 3 дана,
Ун – 3 ас қасық,
Майонез – 3 ас қасық,
Дуз.

Таярланыўы:

Картошка менен геширди жуқалап, пиязди дөңгелек етип туўраймыз. Кейин мультиварканың түбине картошканы бир тегис етип жайластырамыз. Соң үстине фаршты да тап сондай қылып саламыз.

Үшинши – пиязды, төртинши қабатқа – геширди жайластырамыз. Картошканың қалғанын бетине салып шығамыз. Егер фарш артық болса, оны да еки рет қосыўға болады. Дәмине қарап дуз саламыз.

Енди мәйекти шағып араластырып аламыз. Оған ун менен майонезди қосып, тағыда жақсылап араластырамыз. Таяр болған араласпаны тағамымыздың үстине қуямыз.

Бетин жаўып, “Писириў” режимине 60 минутқа қоямыз.

Мазалы ҳәмде пайдалы аўқатымыз таяр болды. Түри шырайлы көринетин болғанлықтан, бул тағамды табаққа (тарелкаға) төңкерип сала берсекте болады. Ҳешқандай көлемин, келбетин бузбайды.

Жағымлы иштей!