Күнлердиң биринде бай инглис ҳаялы Жонсон ханым туўылған күн кешесин белгилемекши болып, оған бирқанша мийманлар ҳәм бир қосықшыны мирәт етеди.

Қосықшы жүдә жарлы, бирақ оның жүдә жақсы даўысы бар еди.

Қосықшы Жонсон ханымның үйине саат алтыда келди, ол үйге киргенде, қапының артынан дөнгелек стол әтирапында, киши ханада толып отырған мийманларды көреди. Мийманлар аўқатланып, күлисип, ҳәм қатты даўыс пенен сөйлесип атыр еди. Туўылған күн ийеси яғный, Мистерс Жонсон қосықшының қасына келеди ҳәм оған «Сизиң келгениңизге жүдә қуўанышлыман. Сизди аўқатланып болғаннан соң қосық айтыўға шақырамыз. Илтимас, ҳәзир асханаға барып аўқатланып алың»,- деп мирәт етеди.

Қосықшы өзиниң кемиситилгенине қатты ренжиди, бирақ ҳеш нәрсе демеди. Қосықшы асханаға кетти ҳәм сол жерде хизметкерлер менен биргеликте аўқатланды. Аўқатланып болып қосықшы хизметкерлерге: «Мен ҳәзир сизлерге қосық айтып беремен, мениң қәдирли досларым»,-деди ҳәм оларға өзиниң жақсы көрген қосықларынан бирин айтып берди.

Бираздан соң Мистерс Жонсон қосықшыны шақырып:

«Бизлер таярмыз»,- деди.

«Таярсыз?»,-сорады қосықшы. «Неге таярсыз?»

«Сизди еситиўге»,- деди Жонсон ханым ашыўланған даўыс пенен.

«Мени еситиўге?»,- бирақ мен әллеқашан қосық айтып болдым.

«Қай жерде?»,- деди Жонсон ханым ҳайран болып.

«Асханада. Мен бәрқулла кимлер менен отырсам сол адамларға қосық айтып беремен»,-деди қосықшы.

Мистерс Жонсон мийманлары алдында жүдә уятлы болып қалады. Келген мийманларда бул қосықшының гәпинен жүдә тәсирленди. Ҳәм де буннан былай ҳешқащан адамларды тайыпаларға бөлип, бай-жарлы деп ажыратпайтуғын, ҳешкимди кемситпейтуғын болды.



Инглис тилинен аўдармалаған:
Сахибжамал Есемуратова