Музыканың инсан қәлбинен орын алыўында оны дөретиўши инсанлардың, яғный композиторлардың үлеси айрықша. Олар инсан руўхыятын бийлеўши, кеўил кейпиятын өзгертиўши сыйқырлы күш ийелери десек қәтелеспеймиз. Бүгин усындай инсанлардың бири ҳаққында биз Сизлерге мағлыўмат беремиз.

Людвиг Ван Бетховен немис композиторы, пианист ҳәм дирижер. Ол 1770-жылы декабр айында дүньяға келген. Людвиг Ван Бетховен дәслепки музыкалық билимин өзиниң әкесинен алады. Атасы Луи Бетховен, әкеси Иоганн Бетховенлер де музыкант болған. Әкеси сарайда капелла яғный хор менен музыкашылардың биргеликтеги коллективинде хизмет еткен. Қосықшы болган, скрипка, клавесине саз әсбапларында жүдә жақсы намалар шерте алған. Людвиг өзиниң ҳешкимге бойсынбаслық, тырысқақлық, менменлик, мийнетсүйгишлик қәбилетлерин атасы Луи Бетховеннен мийрас етип алған.

1780-жылдан баслап Бетховенге Нефе устазлық етеди. 1782-жылы Бетховен 12 жасына толғанда клавесине, скрипка, орган саз әсбапларын жүдә жақсы шерте алатуғын, ал нота дәптериндеги жазыўларды ҳеш қыйналмастан оқый алатуғын болған. 13 жасынан баслап сарайда капелла коллективинде ислей баслады. Ҳәр қандай қыйыншылықларға шыдаған Бетховен, 1787-жылы яғный 17 жасында белгили Вена қаласына келеди. Бетховенның мақсети Моцарт пенен ушырасыў болған. 1792-жылы болса, ол Венаға пүткиллей көшип келеди. Бетховенның биринши устазы Йозеф Гайдн. Ол жас музыкант Бетховенның талантын жақсы баҳалайды. Ол өз еске түсириўлериниң биринде: «Ҳәм билгир, ҳәм жетерлише билимге ийе болмағанлар да Бетховенниң Европа композиторлары арасында ең қәбилетлиси екенин билиўлери керек, ал мен болсам оның устазы екенимнен қуўанышлыман» деп жазады.

Бетховен 1792-жылы 50ге шамалас музыкаларды жаратыўға үлгереди. 1799-жылы ол еки шәкирти яғный, Тереза ҳәм Жозефине Брунсвиклерге сабақ бере баслайды. Дүньяға белгили компазитор Людвиг Ван Бетховен 1827-жылы дүньядан көз жумады.

Еситиў қәбилети. Енди Людвиг Ван Бетховен ҳаққындагы айрым мағлыўматларды келтирип өтсек. Әлбетте, еситиў қәбилети музыкант ушын жүдә әҳмийетли. Бирақ, Людвигте еситиў қәбилетиниң жоғалыў белгиси биринши мәрте 26 жасында сезиле баслаған. Бул ҳаққында ол 1801-жылы өзиниң достысына жазған хатында айтып өтеди. Және де буны адамларға айтыў ол ушын жүдә аўыр екенлигин, сол себепли еки жылдан берли жәмийеттен узағырақ жүриўге ҳәрекет етип атырғанлығы, егер басқа кәсип ийеси болғанында бул ҳәдийсени өзи ушын оншелли дәрежеде аянышлы қабыл етпейтугынлығын, бирақ та музыкант ушын буның жүдә аянышлы жағдай екенлигин айтып өтеди.


Есемуратова Сахибжамал
Сүўрет: google.com