M.agent xızmetinen ko’pshilik paydalanadı. mAgent ko’pshilikke doslar, tanıslar arasındag’ı qarım-qatnastı ta’miyinlewshi qural retinde tanıs. mAgent – bul Mail.Ru kompaniyasının’ u’lken jobalarının’ biri, sonlıqtan Mail.Ru kompaniyası m.Agent sazlawların, qosımsha xızmetlerin basqaradı. Bul qosımsha xızmetlerdin’ ishinde Arxiv qosımsha xızmetinin’ bar ekenin, birew bilse birew bilmeydi.

m.Agenttin’ Arxiv xızmeti Mail.ru saytının’ elektron poshta bo’limine kiritilgen. Paydalanıwshı jeke e-mail ma’nziline kirip, Arxiv xızmetin sazlawı, koriwi mu’mkin. m.Agent arqalı bolg’an barlıq sa’wbetler (tekstler) Arxivte saqlanıp turadı. So’ylesiwler m.Agent qosımshasında (bag’darlamasında) o’ship ketiwi mu’mkin, biraq Arxivte o’shpeydi.

Parol ha’r bir adamnın’ jeke jasırın so’zi dep qaraytug’ın bolsaq, onı tek paydalanıwshının’ o’zi g’ana biliwi tiyis. Al ha’zirgi waqıtta “parol almastırıw” jigit ha’m qızlar arasında ko’p bolmasada ayırım jag’daylarda ushırasıp turadı. Arxiv xızmetinin’ bar ekenin ekewinin’ biri bilse (qız yamasa jigit), m.Agent arqalı ha’tte neshe jıllar dawamında saqlanıp turg’an so’zlerin Arxiv arqalı oqıy aladı. Bunın’ aqıbetinde unatqan adamının’ (kelinsheginin’/ku’yewinin’) barlıq jeke sırların yamasa burıng’ı qarım-qatnası haqqında Arxiv arqalı oqıy aladı.

• Bul o’z gezeginde erli-zayıplılar arasında urıs-ja’njellerdi keltirip shıg’arıwı mu’mkin.
• Yamasa parolin’izdi biletug’ın basqa adam siz haqqın’ızda ko’p informatsiyag’a iye bolıwı mu’mkin.
Joqarıdag’ı unamsız jag’daylar sırt ellerde jiyi ushıraspaqta.

Bunday jag’daylardın’ aldın alıw ushın ne qılıwımız kerek?

- Bunın’ ushın Mail.ru saytının’ elektron poshtasına kirip, shep jaqta jaylasqan (dizaynına baylanıslı o’zgeriwi mu’mkin) Архив Mail.Ru Агента (История общения в агенте) siltemesin basıp, Arxivke kiremiz. Arxiv beti ashılg’annan son’ arxivlerdi ko’zden o’tkeriwge yamasa barlıg’ın o’shirip taslawg’a boladı. Sazlawlar arqalı Arxivti o’shirip qoyıwg’ada boladı.

İnternet tarmag’ınan paydalang’anda informatsiya qa’wipsizligin saqlaw zaman talabı. Sonlıqtan internetten paydalang’anda biyparwa bolmayıq degim keledi.


B. Kalmuratov