Жәрдемге мүтәж инсанларға демеў берип, оларды қоллап-қуўатлаў бизиң ата-бабаларымыздан киятырған қәдриятлардан есапланады. Өзбекстан арнаўлы олимпиадасы жәмийетлик бирлеспесиниң Қарақалпақстан бөлими тәрепинен де майыпларды жәмийетке араластырыў, оларды оқытыў, қоллап-қуўатлаў жумыслары әмелге асырылып келинбекте. Бул шөлкем туўралы бурын хабарымыз болмаса да, олар тәрепинен исленип атырған қайырлы ислери менен танысқаннан соң шөлкемниң бүгини ҳаққында кеңирек мағлыўмат бериўди мақсет еттик.



Республикамызда бирлеспе өз жумысын 2005-жылдан баслап әмелге асыра баслаған. Тийкарғы мақсети ақылы зайып балаларды жәмийетке араластырыў, олардың спорт пенен шуғылланыўы ушын имканият жаратыў, оқытыў болып табылады. Бирлеспе тийкарынан төрт бағдар яғный дени саў атлет (яғный майыпларды диспансеризациядан өткериў), екинши спорт бағдары, социаллық ҳәм бирлестириў бағдары.

Бүгинги күнге келип бирлеспе Хожели районында жайласқан 3-санлы арнаўлы интернатының 207 баласы ҳәм Нөкис қаласында өз үйинде тәрбияланып атырған он бес баланы оқытыў, спортқа тартыў бағдарында жумыс алып бармақта. Өз жумысларын еледе жетилистириў, бирлеспениң материаллық техникалық базасын және де беккемлеў мақсетинде 2012-жылы Өзбекстан Республикасы Олий Мажилиси қарамағындағы Мәмлекетлик емес, коммерциялық емес шөлкемлерди ҳәм пуқаралық жәмийетлерин қоллап-қуўатлаў жәмийетлик қорының киши грантлар таңлаўына қатнасып 12 миллионлық грантын жеңип алған. Грант тийкарында майып балаларға тигиўшилик, қағаздан ҳәр қыйлы моделдеги өнимлерди ислеў бағдарында жумыс алып барыў гөзленген еди. Әсиресе, Айзада Нурымбетова менен Махида Алламбергеновалардың бирлеспе қатнасыўшыларына өткен шеберлик сабағы өз нәтийжесин берди. Буны балалардың өз қолы менен ислеген қурақ көрпешелери менен қағаздан исленген шырайлы өнимлерден де көриўге болады.



- Туўрысын айтсақ, ҳәр қыйлы кеселликке шатылып, үйинде тәрбияланып атырған бала белгили бир себеплер менен жәмийеттен шетлеп қалыўы мүмкин. Бизиң бирлеспемизге келип өнер үйренип, өз қолы менен ислеген өнимин көрип ата-анасының миннетдар болып атырғанын ақ бул балаларға азғана итибардың өзи ақ олардың жигерине-жигер, күшине күш қосатуғынын аңлаў қыйын емес. Нөкисли Айгүл Нийетуллаева деген қызымыз миллий кийим тигиўди меңгерип алды. Айгүл 2007-жылы Шанхайда болып өткен дүнья жүзилик арнаўлы олимпиада ойынларында стол тенниси бойынша қатнасып алтыншы орынды ийелеўге еристи. Жоқарыда атап өткен проектимиз бойынша Айгүлдиң үйине еки тигиў машинасын алып бердик. Ҳәзирги күни үйинде миллий кийимлерди тигип, дәрамат таўып атыр. Бизиң тийкарғы мақсетимиз оларды спортқа тартыў арқалы жәмийетке араластырыў. Мениң ойымша үлкен жастағы майып инсанларға да өнер ҳәм билим сырларын үйретип барсақ мақсетке муўапық болар еди. Себеби, майып инсанға бағдар бериўши, өнер үйрететуғын инсан болса, тез қабыл етеди және мийнеттен тай салмайды,-дейди бирлеспе баслығы Гүлшат Турсымуратова.

Әлбетте, бирлеспе тәрепинен исленип атырған жумыслар мақтаўға ылайықлы. Лекин, бирлеспе тек ғана бул жумыслар менен шекленип қалып атырған жоқ. Олар майыплар менен бирге ҳәр қыйлы байрам ҳәм илажларды шөлкемлестирип бармақта. Итибарлы тәрепи бирлеспе тәрепинен исленип атырған жумыслар шын кеўилден, ҳақ нийет пенен исленип атыр.


Ҳүрмет Атажанов,
Сүўретте: Бирлеспе ағзаларының өз қолы менен ислеген өнимлери