Кишкенелигинен қыйын аўҳалда қалып, жәрдемге мүтәж инсанлар мәмлекетимиз тәрепинен барлық ўақытта қорғаўға алынып келинбекте. Әсиресе, майып инсанларға ҳәр қыйлы өнер сырларын үйретип, оқытып, қоллап-қуўатлаў жумыслары менен республикамызда Қарақалпақстан республикасы майыплар жәмийети шуғылланып атыр. Жәмийет өз жумысын 1998-жылдан баслап әмелге асыра баслады. Республикамыздың барлық районларында өз бөлимлери жумыс алып бармақта.

Қысқа ўақыт ишинде жәмийет майыплардың ең жақын жәрдемшисине айланды. Буның ушын жәмийет тәрепинен бир қатар жумыслар жолға қойылды. Әсиресе, 2007-жылдан баслап Өзбекстанның мәмлекетлик емес, коммерциялық емес шөлкемлери миллий ассоциациясы ресурс орайы менен биргеликте жумыс алып барып атырғаны өз нәтийжесин берди. Ассоциацияның қоллап-қуўатлаўының арқасында 2008-жылдан баслап жәмийетте бир қатар ушырасыў ҳәм семинарлар өткериле баслады. Ал, 2009-жылы болса, жәмийет тәрепинен Өзбекстан Республикасы Олий Мажилиси қарамағындағы Мәмлекетлик емес, коммерциялық емес шөлкемлерди ҳәм пуқаралық жәмийетлерин қоллап-қуўатлаў жәмийетлик қорының грантын жеңип алды. Гранттың тийкарғы мақсети ҳаял-қызларға тигиўшилик сырларын үйретиў болды. Усы мақсетте жигирма майып ҳаял-қыз оқытылды ҳәм жәмийетте өз орнын таўып кетиўге ерискен.



- Жәмийеттиң тийкарғы мақсети, үлкен өмирге қәдем атып, өз гүзар жолын таблаў ушын ҳәрекет етип атырған майып инсанларға демеў болыў ҳәм оларды оқытыў арқалы кәсипке бағдарлаў болып табылады. Мениң пикиримше, жәмәәтимиз ағзаларының талапшаңлығы ҳәм жоқарыда атап өткен қордың қоллап-қуўатлаўының арқасында республикамызда жасаўшы көп ғана майып инсанлар өнер үйренди, шаңарағына дәрамат келтириўдиң жолын тапты деп ойлайман. Мәселен, 2010-жылы Өзбекстан Республикасы Олий Мажилиси қарамағындағы Мәмлекетлик емес, коммерциялық емес шөлкемлерди ҳәм пуқаралық жәмийетлерин қоллап-қуўатлаў жәмийетлик қоры тәрепинен шөлкемлестирилген грант таңлаўында Республикалық майыплар жәмийети 10 миллионлық грант жеңип алып 25 майып инсанды қоллап-қуўатлаған болса, Хожели районлық ҳәм Нөкис қаласы майыплар жәмийети 8 миллионнан грант жеңип алыўға еристи. Бул грантларымыздың тийкарғы бағдары «Майыпларға компьютер сырларын үйретиў» ҳәм «материаллық техникалық базаны» беккемлеўге қаратылған еди. Соның менен бирге 2011-жылы Әмиўдәрья ҳәм Елликқала районларының майыплар жәмийетлери атап өткен қорымыздың 15 миллионлық грантын жеңип алды. Усы күнге шекем бул жерде 25 майып адам оқып, белгили бир кәсиптиң ийесине айланды. Лекин буның менен шекленип қалыў нийетимиз жоқ. Майыпларды қоллап-қуўатлыў, оларға кәсип сырларын үйретип барыўды даўам ете беремиз, дейди жәмийет баслығы Паршагүл Дәўлетярова.
Туўры, жәмийет тәрепинен кейинги жыллары да қайырлы ислер даўам еткенин көриўимизге болады. 2013-жылы, жоқарыда атап өткен қор тәрепинен усынылған грантты Тахтакөпир, Төрткүл, Хожели, Беруний, Нөкис районлары майыплар жәмийети де жеңип алып, майыпларды оқытыў, оларды материаллық қоллап-қуўатлаў жумысларын алып бармақта.
Бизиң пикиримизше, жәмийет тәрепинен 2014 – Саламат бала жылында да қайырлы ислер даўам етеди ҳәм раўажланып бара береди.


Ҳүрмет Атажанов,
Сүўретте: Жәмийетте қызлар тигиўшилик сырларын үйренбекте