Burıng’ı o’tken zamanda bir sawdagerdin’ ba’rqulla “baxıtsızban” dep o’kinetug’ın ulı bolg’an eken. Baxıttın’ sırın biliwge a’kesi onı sol zamandag’ı en’ danıshpan, ullı adamg’a jiberipti. Ku’n ıssıda ulı sho’l dalalar menen qırıq ku’n jol ju’ripti. Bala jol ju’rip alıstan sol danıshpannın’ sarayın ko’redi.

Sarayda ko’p adamlar ju’rgenin sezedi. Bir ta’repinde qosıqshılar qosıq aytıp, oynap ju’rse, ekinshi ta’repinde qonaqlar sa’wbetlesip tur. Olardın’ barlıg’ı danıshpang’a sorawların beriw ushın gezekte turıptı. Balanın’ gezegi kelgen waqıtta bala danıshpang’a “Baxıt sırı nede?” – dep soraw beredi. – Danıshpan bolsa, bul sorawın’a juwap beretug’ın waqtım joq, saray sırtına shıg’ıp seyil qıl, eki saattan son’ qayttan aldıma kel dedi. Son’ danıshpan og’an qasıq berip, qasıqqa eki tamshı suw tamızadı. Seyil waqtında mına qasıqtag’ı eki tamshı suwdı to’gip almawg’a ha’reket et deydi. Hesh na’rsege tu’sinbegen jigit saraydın’ ishin ha’m sırtın aralap qıdıradı. Biraq qasıqtag’ı eki tamshı suwdı baqlap, onnan ko’z almay ju’redi. Eki saat o’tkennen son’ bala danıshpannın’ aldına keledi.

- Danıshpan jigitten “Menin’ sarayımdı araladın’ba?” - dep soraydı.
- Jigit, “Awa araladım, sarayın’ız ju’da u’lken eken” – dep juwap beredi.
Son’ danıshpan: “Jerge to’selgen ka’ramat gilemlerdi, diywallardag’ı u’lken saatlardı, bag’ımdag’ı gu’llerdi ko’rdin’be? Kitapxanamdı ko’re aldın’ba?” – dep soraptı.

- Sonda jigit danıshpan aytqan ka’ramatlardın’ birewinde ko’rmegenin moynına aldı. Ol, bar intasın ha’m dıqqatın qasıqtag’ı eki tamshı suwg’a qaratqanın, basqa hesh na’rsege itibar bermegenin ayttı.

Danıshpan og’an “O’zin’ kewil bo’lmegenin’she, dıqqat qaratpag’anın’sha, a’jayıptan la’zzat ala almaysan’” – dep, qaytadan saraydın’ ka’ramatın tamashalawdı buyıradı. Jigit saraydı aralawg’a qayta shıg’ıptı. Biraq, bul ret ol ha’mmesine itibar menen qaraydı. Bag’dag’ı xosh iyisli gu’llerden, saray diywalına salıng’an su’wretlerdi ko’rip, kewli ko’teriledi. Danıshpang’a kelip ha’mmesin aytıp beredi.

- Sol ma’written son’ g’arrı: “Men qasıqqa tamızg’an eki tamshı qayaqta?” – deydi. Jigit qasıg’ına qarasa tamshı to’gilip, qasıg’ı kewip qalg’an eken.
- Sonda g’arrı: “Sen baxıt sırın, qasıqtag’ı eki tamshını umıtıp, bul o’mirdin’ haqıyqıy sulıwlıg’ınan ra’ha’tlengenin’di bildin’!” – degen eken.