Mine ja’ne bir nurlı tan’ attı. A’dettegidey, erte uyqımnan oyandım. Ko’p waqıt o’tpey oqıw da’rgayım universitetke jetkenshe asıqtım. Jolda ketip barar ekenmen, qarsı aldımnan jası u’lken bir apay shıqtı. Og’an “Assalawma aleykum, apa” – degen sa’lemime juwap retinde “Baxıtlı bol, qızım” – dep a’lik aldı. Sol ku’ni ku’n boyı joqarı keypiyatta ju’rdim ha’m apaydın’ so’zleri qayta esime tu’sip, baxıt tuwralı teren’ oylandım. Baxıt ne o’zi? Ha’m en’ son’ında sonı an’lap jettim, baxıtti bir so’z benen ta’riyplep bolmas eken. Negedur baxıt tuwralı belgili bir so’z aytıwg’a o’mirdegi ta’jiriybem jetispeytug’ınday seziledi. Sonda da, ol tuwralı oylarım ha’m pikirim arqalı sizler menen ortaqlasıwdı lazım taptım.

İnsan en’ da’slep o’z ırısqı nesiybesi arqalı du’nyag’a keledi. Son’, jasap atırg’an pu’tkil o’miri dawamında ta’g’dir sınawlarınan izbe-iz o’tip, na’tiyjede baxıt dep atalatug’ın sawg’anın’ iyesi boladı. Jan’a tuwılg’an na’reste –misli aq qag’az. Onın’ jası mingen sayın o’mir atlı ku’ndeliginde baxıt, baxıtsızlıq atamaları iz qaldırıp baradı. Biraq, bul keltirgen mısallarım “BAXIT” degen u’lken saraydın’ “tırnag’ın” qoyıp bere almay atır. Sonda qon’sımız Da’metken apadan;

-Apa, baxıt o’zi nede?- dep sorag’anımda, apay ko’p pikirler menen qosa bir ra’wayattı aytıp berdi.

-Erte zamanda bir bay menen bir kembag’al o’mir su’rgen eken. Bay baxıttı baylıqta dep esaplaytug’ın eken. Bir ku’ni bay kembag’al insandı qasına shaqırıp;

-Ayt, sen baxıtlısan’ba? –depti

-Awa, men baxıtlıman-dep juwap beripti kembag’al.

Sonda bay;

-Ey, qam su’t emgen bende! Sende mendegi bar baylıq, qora-qora mal, u’yir-u’yir jılqı sende joq bolsa, sen qalay baxıtlısan’?-dep mırs etip ku’lipti. Kembag’al bul so’zge hesh qapa bolmay;

-Ko’zlerim jarıq du’nyanı ko’rip, qulaqlarım du’rkin-du’rkin so’zlerdi esitip turg’anı, on eki mu’shemnin’ saw bolg’anı-menin’ baxıtım dep juwap qaytarıptı.

Men bul ra’wayattan o’zime sabaq aldım. Kembag’al bolsada aqıllı juwap qaytarg’an insa’nnın’ so’zlerin oylarıma ja’mledim. Biraq bul danalıq so’zler de mag’an tınıshlıq bermedi. Oyımda bir vulkan qaynap kelip, mende to’mendegishe pikirdi keltirip shıg’ardı.

“Yag’nıy qansha ko’zlerin’ ko’rip turg’anı, qansha qulaqların’ esitip turg’anı menen, qansha on eki mu’shen’ saw-salamat bolg’anı menen du’nyada hesh bir insang’a kerek emes bolsan’, menin’she bunnan artıq baxıtsızlıq bolmasa kerek!”

Men oylayman, du’nyada kimgedur kerek ekenligin’di bilip, sezip jasawdın’ o’zi bir-BAXIT! Demek, bu’gingi ku’nde ha’r bir insan baxıtlı. A’sirese, bu’gingi ku’nnin’ jasları-en’ baxıtlı insanlar. Sebebi, olar ja’miyet ushın, erten’gi keleshek ushın za’ru’r. Sonday-aq, ja’miyette ha’r kimnin’ o’z ornı bar. Yag’nıy, ja’miyet ushın, xalıq ushın kerekli. Bul degeni-bul du’yada ba’rshemiz baxıtlımız ha’m baxıtlı bolıwg’a haqqımız bar!


QMU 1 kurs studenti Biybisara Qudaynazarova