Bu’gin … Ha’r ku’ni quyash insanlarg’a o’zinin’ saqıylıg’ı menen jaqtılıq nurların ina’m eter eken, a’lemge go’zzallıq taralg’an sıyaqlı bir-birimizge na’zer taslasaq, kewil quwanıshqa bo’lenedi. Erte tan’nan u’lken jolg’a qarap turg’an aynadan sırtqa sıg’alaw men ushın a’det tu’sine engen edi. Sebebi, qaladag’ı en’ ko’p avtomobil usı joldan ha’reketlenedi. Jol to’rt ta’repleme ha’reketleniwge bag’darlang’anlıg’ı ushın u’lken svetaforlarda usı jerge ornatılg’an. O’mir ha’r ku’ni qay ta’repke bolsada avtomobillerdi o’z izmine salıp, jedellik penen ha’reketleniwge iytermeleydi. Sol ta’rizli jol shetindegi piyadalar ha’reketlenetug’ın tratuarda o’z jolawshılarının’ san mın’ ayaq izleri basılg’an kelbeti menen ja’ne bir ku’ndi u’mit penen qarsı aladı.

Qızıq… Demek, ha’tte tratuarda ja’ne insannın’ qutlı qa’demlerine gu’lli gu’zar jol bolıw umiti menen atqan tan’dı qarsı alar eken. Bul jolda insanlar bir-birine itibar bermesten, o’z ma’nziline qaray talpınar, asıg’ar ha’m ja’ne asıg’ar. Mine, usı halat meni o’zgeshe sezimler jurtına ma’lika qılıp, o’mirge, jasawg’a degen muhabbatımdı asıradı.

O’mir - u’lken soqpaqqa megzes. Usı soqpaq bizdi qay ma’nzillerge jetelewi hesh birimizge ayan emes. Lekin, bir haqıyqat bar. Bul haqıyqat kim o’zinde ku’sh tawıp jaqsıllıqqa, jaqsı islerdin’ basında bolıwg’a bel baylasa a’lbette, ka’millikke jetisedi. Alla taalada jaqsını, jaqsı isti qollaydı. Ha’reket ha’miyshe o’zinin’ na’tiyjesin beredi. Solay eken, kewil go’zzallıqqa, niyetler bolsa jaqsılıqqa tolı bolsın. Men jasaw zawqın ha’rekette dep bilemen ha’m jaqsılar menen bir hawadan na’pes alıp atırg’anım ushında o’mirden quwanıshlıman.


Seytnazarova Gu’ljahan.