Бүгинги күнде дүньяда гаджетлер ишинде смарт саатларда өз орнына ийе. Сонлықтан электроника өндириўшилер смарт саатларды өндириўди жолға қойды. Дәслеп бундай саатларды Samsung компаниясы ислеп шыққан болса, кейин Apple корпорациясыда өз өнимлерин шығара баслады. Енди мине Microsoft компаниясыда смарт саатларды ислеп шығарыўға бел байлады.

Microsoft компаниясының бул тараў менен шуғылланыўы рәсмий түрде айтылмаса да, интернетте бул ҳаққында информациялар жәрияланған. Бул информацияны бириншилерден болып Reuters.com сайты хабарлады.

Енди бул өнимниң презентациясы қашан өткериледи? Ҳәзирше анық ўақты белгисиз, бирақ бир неше ҳәптениң ишинде көпшилик нәзерине усынылады.

Бул сааттың қандай артықмашылықлары бар? Әлбетте бул өним биринши нәўбетте фитнес ушын бейимлескен болыўы мүмкин. Экраны 1,5-дюм ҳәм аппарат 11 түрли функцияны атқарады. Олардан атап өтсек, тутыныўшылардың басқан адымларын, азайған калориясын, жүрек урыўының тезлигин ҳәм басқада адамның параметрлерин анықлайды. Бирақ бул саат смартфонға қосылмайтын (жалғанбайтын) болса, ол жумыс ислемейди. Сондай-ақ, өндириўшилер смарт саатты тек Windows Phone платформасындағы смартфонларға қосылыўы менен бир қатарда басқада платформаларды қоллайды. Себеби тек Windows платформасы менен шекленгенсе, өнимниң сатылыўы аз муғдарда болыўы мүмкин. Демек солай екен, iOS пенен Android фанатларыныңда Microsoft өнимин қолланыўына мүмкиншилик бар.


дерек көзи: reuters.com