Түски мезгил. Студентлер оқыўдан, жумысшылар түсликке қайтатуғын ўақыт болғаннан соң, автобус тығылыс, баса-бас, бақырыс пенен шақырыс. Қысылып қалдың-ба? яки, жас балаң бар-ма?!-Сениң менен ҳеш кимниң иси жоқ.

Тап, усы пайытта, автобустың есигиниң аўызында орта жасларға барып қалған бир жигит, өзи қатары бир нашар менен қарама-қарсы турып қалыпты. Шала мәс жигит дәслебинде де сораса керек, бизлер автобусқа шыққаннан соң да, бес, алты мәртебе:

-Тап, мен мына нашар егерде, атын айтса таныйман. Усы келиншек пенен бир отырыспақта ма?. Тойда ма?-қулласы қай жерде екенлиги ҳәзирше ядымда жоқ бирақ, бирге отырысқанбыз!. Түр-түси ыссық, жүзи таныс. Атын айтпай тур:

-Ҳәй қарындас! -Атыңыз ким болады?-десе, қарама-қарсы турған келиншек елестирмеген пишинде қаптал тәрепке қарады. Шала мәс жигит болса булдыўлап, сөйлеўин даўам етти:

-Тап, усыдан атыңды айтпасаң, үйиңе шекем бараман. Кемпир, ғарыларыңнан, қоңсы-қобаларыңнан-ақ, аты-жөниңди, туўылған жылыңды, питкерген оқыўыңды билип аламан ғо,-деп болып келеси бәндиргиде қайтадан, күшенип:

-Ҳәй, қурдас боласаң ба? Қарындас боласаң ба?, Аўыллас боласаң ба?-деп жигит, бир сөзин қайта-қайта қайталап тур еди, қарсы турған келиншекте де сабыр, тақат таўсылса керек, ол да ғәзепке минип, ашшы даўыс пенен:

-Сен, тандыры шыққыр сениң-ә! Сен мени растан-ақ, танымай турсаң ба? Мен сени мәс болғаннан соң, жортаға, ойнап турған шығар десем:-деген ўақытта жигит бул нашарды даўысын таныса керек, аз-маз өзине келип, кейин қарай серпилди. Бирақ, сол бәндиргиде адам көп, тығылыс болғаннан соң, буларды және қайтадан бурынғы қәддине келтирип, искенжеге алды.

Сол пайытта жаңағы нашар қайтадан қызып, ғәзепленип, қатты даўыс пенен сөйлей баслады:

-Ҳаў, сен ширкин. Мениң аўызымды қыздырайын деп турсаң-ғо. Ҳә, аўызыңның тандыры шыққыр сениң-ә. Мынаў растан-ақ, мени танымай турыппа?. –Ҳаў, мен сениң биринши ҳаялыңман. Атым Тамара, болдыма?! Енди атымды билип алдың ба?!-деген ўақытта күни мененги автобустағы бақырыс пенен шақырыс, ғаўырлы тым-тырыс болды. Күни менен ол нашарға жабысып, көпирип, еркелеп сөйлеп турған жигит, сонша адамды айырып, автобустың ортасына өткенин өзи де сезбей қалды.


Бийсенбай БЕКМУРАТОВ.