Futbol – millionlardı o’zine qaratqan, millionlardı su’ydirgen oyın. Futbol tariyxında a’jayip oyınlar, aqılg’a sıymas da’rejedegi jag’daylar ju’z bergen. Sonday oyınlardın’ biri 1994-jılı Barbados ha’m Grenada qurama komandaları ortasında bolıp o’tti.

Karib ten’izi aymag’ı ma’mleketleri “Shell Caribbean Cup” atlı xalıqaralıq futbol turnirin o’tkerip turadı. Usı turnirde 1994-jılı “A” gruppasında Barbados, Grenada ha’m Puerto Riko komandaları qatnasadı. Gruppadan tek bir komanda g’ana keyingi basqıshqa o’tiw imka’niyatına iye boladı. 1-turda Grenada Puerto Riko qurama komandasın 2:0 esabında jen’edi, al Barbados Puerto Riko komandasınan 0:1 esabında jen’ilip qaladı. Gruppada mınaday jag’day ju’zege keledi:
Grenada 3 oshko, toplar parqı 2:0;
Puerto Riko 3 oshko; toplar parqı 1:2;
Barbados 0 oshko, toplar parqı 0:1.

Son’g’ı oyında Grenada ha’m Barbados qurama komandaları oynawı kerek boladı. Keyingi basqıshqa o’tiw ushın Grenada Barbadosqa jen’ilmewi, Barbados bolsa Grenadanı 2 gol parqı menen jen’iwi kerek edi. En’ qızıg’ı, sol turnir reglamenti boyınsha, gruppadag’ı oyınlar ten’ esapta juwmaqlansa qosımsha waqıt belgileniwi, qosımsha waqıtta gol urılsa, ol “altın gol” esaplanıp, bunday gol 2 golg’a ten’ bolıwı kerek edi.

Solay etip, Barbados-Grenada oyını baslanadı. Da’slep Barbados tez eki gol urıp, 83-minutqa deyin 2:0 esabında jen’ip atır edi. Bul esap olardı qanaatlandırar edi. Biraq, 83-minutta olar o’z da’rwazalarına avtogol urıp qoyadı. Esap 2:1 bolıp o’zgeredi. Grenada oyınshıları endi o’z da’rwazalarınan shıqpay, “artta jatıp aladı”. 88-minutqa kelip, Barbados qurama komandasının’ qorg’awshı oyınshıları – Sieli ha’m Staut komandasının’ endi gol ura almawın sezip, toptı o’z da’rwazaları janında bir-birine pas berip uslap turadı. Sonda Sieli ha’mmenin’ ko’zi aldında birden o’z da’rwazasına bilip turıp gol uradı. Ba’lkim, sizler onı aqmaq dep oylarsız, haslında bolsa ol en’ aqıllı sheshim qabıl etken edi. Sebebi, turnir reglamenti boyınsha, oyın ten’ esapta juwmaqlansa, qosımsha waqıt belgileniwi ha’m onda “altın gol” urg’an komandanın’ golı 2 gol esabına ten’lestiriwi kerek edi. Usı na’rse Barbados komandasına kerek edi. Sielidin’ bul ha’reketinen Grenada oyınshıları ha’m tamashago’yler hayran qaladı.

Biraq, oyın komediyası endi baslanıp atır edi. Endi oyındı qosımsha waqıtqa alıp barmaw ushın Grenada gol urıwı kerek edi. En’ qızıg’ı, o’zlerinin’ da’rwazasına gol ursa da bola berer edi. Sebebi, 3:2 esabındag’ı Barbadostın’ jen’isi Grenadanı keyingi basqıshqa alıp shıg’ar edi. Stadiong’a kelgen tamashago’yler oyındı qızıg’ıp ko’re basladı. Grenada oyınshıları endi o’zlerinin’ da’rwazasına gol urıwg’a ha’reket etpekshi boladı. Bunı jaqsı an’lag’an Barbados oyınshıları bo’linip, HA’M O’ZLERININ’, HA’M QARSILASLARININ’ DA’RWAZASIN GOLDAN QORIQLAWG’A kirisedi. Barbados komandası qorg’awshısı Sieli Grenadanın’ bos qalg’an da’rwazasın qorg’awg’a kirisedi. Tiykarg’ı waqıttın’ 2 minutı ha’m qosıp berilgen 4 minut dawamında Grenada oyınshıları ya o’zlerinin’, ya qarsılaslarının’ da’rwazasına gol urıwdı epley almaydı (Avtogol urıwdı Akmal Shorahmedovtan u’yreniw kerek edi!!!). Barbados oyınshıları qalg’an waqıt dawamında qaharmanlarsha “turıp beredi”.

Qosımsha waqıtlarda Barbados du’zgen joba a’melge asadı. Barbados oyınshısı Torn Grenada da’rwazasına “altın gol”dı uradı ha’m komandasının’ 4:2 esabında jen’iske erisiwin ta’miynleydi. Barbados aqılg’a sıymaytug’ın usılda keyingi basqıshqa shıg’adı. Stadiong’a kelgen tamashago’yler bunday oyındı gu’zetip, sheksiz quwanıshqa bo’lenedi. Oyınnan keyin Grenada qurama komandası ustazı Djeyms Klarkson bılay deydi: “O’zimdi aldap ketilgen sıyaqlı sezip turman. Bunday reglamentti oylap tapqan adamdı jinlixanag’a jiberiw kerek. Bunday oyın hesh aqılg’a uyqas kelmeydi. Bizin’ oyınshılar qaysı da’rwazag’a gol urıwın bilmey ekilenip qaldı. Bunday oyındı o’mirimde ko’rmedim”.

Siz de bunday oyındı qıyalın’ızg’a da keltire almag’an bolar edin’iz. Ehh, futbol! Ba’lkim usınday demler ushın da ha’mmemiz seni jaqsı ko’rermiz!


Tayarlag’an: Mamutov Marat.