Qazaqstandag’ı Qarag’andı Ma’mleketlik Texnikalıq Universitetinin’ 1-kurs studentleri Qayrat ha’m Eldar atlı eki student universitet xanalarının’ birinde stoldın’ u’stine shıg’ıp “Garlem Sheyk” oyının oynag’an. Oynaw menen bir qatarda stoldı da sındırıp u’lgergen. Ta’rtipsiz ha’reketlerin jalg’astırıp, atalg’an oyındı kamerag’a tu’sirip internet tarmag’ı arqalı ja’riyalag’an. Bunday a’depsiz ko’rinislerdi sho’lkemlestirgen eki student universitet basshılıg’ı ta’repinen oqıwdan quwıldı. Bul haqqında Qazaqstannın’ jergilili telekanalları ha'm olardın’ saytında xabarlandırıldı.

Qayrat ha’m Eldar isimli bul studentler oqıwg’a grant tiykarında qabıl etilgen. Biraq oqıwının’ 1 kursınan baslap usı studentler mine unamsız ha’m uyatsız, mentalitetke say kelmeytug’ın ha’reketlerdi sho’lkemlestirgeni ushın olardı oqıw ornı basshıları grantınan ayırdı ha’m oqıwınan shetletti. - Bul basqalarg’ada o’rnek bolsın deydi universitet prorektorı Viktor Egorov.

Usı waqıtqa shekem garlemsheykke berilip oynag’anlardın’ ko’pshiligi sıng’a alınsa, al ayırımları jumıslarınan ayrılg’an. Ma’selen, Avstriyalıq metal o’ndiretug’ın 15 jumısshı, ka’n ornında oynag’anı ushın litsenziyasınan ayrılg’an. Al samolyottın’ qanatına minip oynag’an a’skerlerdin’ ha’reketinen, BMSH-nın’ ag’zaları Kipr basshılıg’ınan keshirim sorag’an. AQSH shtatının’ biri Pensivaniyada jergilikli universitetten 11 student oqıwdan shıg’arılg’an. Al Rossiyanın’ Sverdlovsk wa’layatında bir topar adamlar u’stinen jinayıy is qozg’aldı. Olar “Garlem sheyk” oyının Urıs qatnasıwshılarının’ memoriallıq esteliginin’ u’stine minip oynag’an.

Sırt ellerden kirip kelip atırg’an bunday unamsız, a’depsiz ha’reketlerge bay bunday oyınlar hesh bir xalıqtın’ mentalitetine tuwrı kelmese kerek. Bunı ha’tte oyın depte atag’ın’ kelmeydi. Globallasıw protsesinde bunday jat a’detlerge eliklegen adamlarg’a mine usınday jazalar ha’m berilip atır. Ne u’mitler menen joqarıdag’ı eki student ata-analarının’ u’mitin aqlay almadı. İnternet tarmag’ında informatsiyalar ag’ımı sheksiz bolg’anlıqtan ondag’ı informatsiyalardın’ barlıg’ıda isenimli emes. Unamsız ko’rinislerge bay video filmler, oyınlar olar tek g’ana adam ushın zıyanın tiygizedi. Sonlıqtan bunday ko’rinislerge eliklemey, ta’sirine tu’sip qalmaw ha’zirgi waqıtta siz ha’m bizden talap etiledi.


Bekan’s blog