Qaraqalpaq ma’mleketlik universiteti ja’ma’a’ti bayramlar qarsan’ında ja’ne bir quwanıshlı waqıyag’a dus kelmekte. Yag’nıy universitet bas imaratı rekonstruktsiyadan shıg’ıp, paydalanıwg’a tapsırılıwı mu’na’sibeti menen 11-yanvar ku’ni imarattın’ ashılıw ma’resimi saltanatlı tu’rde o’tkerildi.



Onı universitet rektorı M.Jumanov kiris so’z benen ashtı ha’m jıynalg’anlardı bul quwanıshlı waqıya menen qutlıqladı. Ol o’z so’zinde bılay dedi: “Bu’gingi saltanatlı keshede universitetimizdegi son’g’ı jetiskenliklerdi u’lken maqtanısh penen aytıp o’tiwdi orınlı dep esaplayman. O’ytkeni, Hu’rmetli Prezidentimizdin’ 1533-sanlı Qararı tiykarında O’zbekistan Respublikasındag’ı sanawlı g’ana joqarı oqıw ornı qayta on’law ha’m rekonstruktsiya da’stu’rine kirgizilgen bolsa, solardın’ biri - Qaraqalpaq ma’mleketlik universiteti. 2014-jılı universitetimiz ushın reje boyınsha belgilengen qarjı ajıratıldı. Na’tiyjede 4 binamız rekonstruktsiyadan shıg’ıp, en’ zamanago’y a’sbap-u’skeneler menen ta’miyinlenip tolıq paydalanıwg’a tapsırıldı. Bunnan tısqarı, o’tken 2015-jılı universitetimizdin’ rekonstruktsiya jumısları ushın da tiyisli qarjı ajıratılıp, ha’zirgi ku’nleri o’zlerin’iz guwası bolıp turg’anın’ızday, qurılıs jumısları qızg’ın pa’t penen jedel alıp barılmaqta.

Al bıyılg’ı jılg’ı qurılıs, rekonstruktsiya ha’m iri kapital on’law jumıslarıhaqqında aytatug’ın bolsaq, Universitetimizdin’ 3-4-sanlı oqıw binası, Ma’limleme resurs orayı, 1-2-sanlı Studentler turar jayı binaların on’law jumısları, sonday-aq, 24x42m o’lshemde bolg’an “Sport kompleksi” jan’adan qurıw jumısların alıp barıw boyınsha adreslik da’stu’rine kirgizildi.

Bu’gin biz, minekey, universitetimizdin’ bas binası imaratının’ paydalanıwg’a tapsırılıp atırg’anının’ gu’wası bolıp turmız.

Biz bunı hu’rmetli Prezidentimizdin’ – keleshegimiz bolg’an jaslarımızg’a degen atalarsha g’amqorlıg’ı ha’m a’dil siyasatının’ na’tiyjesi dep bilemiz!

Hu’rmetli Jurtbasshımızdın’ atap o’tkenindey, “Ma’mleketimizde qa’liplesken u’zliksiz bilimlendiriw sistemasının’ joqarı basqıshı bolg’an joqarı oqıw ornılarının’ materiallıq-texnikalıq bazasın bekkemlew, joqarı bilimli jetik qa’nigeler tayarlaw sapasın asırıw maqsetinde olardın’ xızmetin jetilistiriw za’ru’rligin turmıstın’ o’zi talap etpekte!”

Bul bag’dardag’ı islerdi a’melge asırıwda universitetimizdin’ ilimiy jetiskenlikleri jan’a texnologiyalardı na’tiyjeli o’zlestiriwge tiykarlang’an innovatsiyalıq kapitalı ha’m onın’ sapa da’rejesi jetekshi wazıypalardın’ birin orınlaydı.

Sonday-aq, student jaslarımız arasınan keyingi jıllarda Prezident stependiantı 5, Zulfiy atındag’ı ma’mleketlik sıylıqtı, 6 Ulıg’bek, 11 Nawayı ha’m 40 tan aslam Berdaq atındag’ı ma’mleketlik stipendiya jen’impazları shıqqanlıg’ı, al ha’zirgi waqıtta bolsa universitetimizde 1 Ja’ha’n, 4 Aziya, 27 O’zbekistan chempionları ha’m basqa da ko’plegen sport jaslarının’ jen’impazları bilim alıp atırg’anlıg’ı dana xalqımızdın’ “Ju’zden ju’yrek mın’an tulpar shıg’adı” degen ibiratlı so’zlerin a’yne tastıyıqlap turg’anday !

Sonın’ menen birge, Prezidentimizdin’ 2009-jılı 2-apreldegi “Yagonasan muqaddas Vatan” tan’lawın o’tkeriw haqqındag’ı” PQ-1091-sanlı Qararına muwapıq O’zbekistan Respublikası joqarı oqıw orınları arasında ha’r jılı da’stu’riy tu’rde o’tkerilip kiyatırg’an “Yagonasan muqaddas Vatan” tan’lawında universitetimizdin’ “Hu’rliman” xalıq ansambli keyingi bes jılda sıylı birinshi orındı alıp xalıq ansambli atag’ın alıwg’a miyasar boldı ha’m Qaraqalpaqstan Respublikası Joqarg’ı Ken’esi Hu’rmet jarlıg’ı menen sıylıqlandı.

2015-jılı Tashkent qalasında «Ertangi kun bizniki, marra bizniki” uranı astında bolıp o’tken jaslar ha’pteliginde «Studentler teart studiyası» festivalında universitet “Jayhun” teatr studiyası “Terbenbes ju’rekler” atamasındag’ı spektakli menen qatnasıp “En’ jaqsı spektakl” dep tabıldı ha’m birinshi orındı iyeledi.

Sonday-aq, o’tken jıldın’ fevral ayında O’zbekistan Respublikası Ministrler Kabinetinin’ “Joqarı bilimlendiriw ma’kemesinin’ en’ jaqsı pedagogı” tan’lawında Qorshag’an a’tiraptı qorg’aw bilimlendiriw tarawı boyınsha universitetimizdin’ “Эkologiya ha’m topıraqtanıw” kafedrası baslıg’ı dotsent Yaqıpbay Ametov 2015-jıldın’ “En’ jaqsı pedagog-izertlewshi” nominatsiyası jen’impazı dep tabıldı.

Respublika hayal-qızlar “Olima” birlespesi ta’repinen ha’r eki jılda bir ma’rte hayal-qızlar ortasında o’tkerilip kiyatırg’an “İlim juldızları” tan’lawında “Biologiya” kafedrası dotsenti Gulnaz Begdullaeva jen’impaz atandı.

Student-jaslarımız xalqımızdın’ iygiligi, Ana Watanımızdın’ pa’rawanlıg’ı jolında jemisli xızmet etip, g’a’rezsizligimizdi bunnan bılayda bekkemlewge, elimizdi ha’r ta’repleme rawajlandırıwg’a ayanbastan o’zlerinin’ salmaqlı u’lesin qosadı - dep, bu’gin men ba’rsheni isendirip qalmaqshıman! Sizlerge - a’wmet, tabıs ha’m talmas ku’sh g’ayrat tileymen!”.

Bunnan son’ Qaraqalpaqstan Respublikası Joqarg’ı Ken’esinin’ komitet baslıg’ı B.Nurabullaev, O’zbekistan Respublikası Joqarı ha’m orta arnawlı bilimlendiriw ministrliginin’ ilimiy orayı baslıg’ı J.Qudaybergenov, Qaraqalpaqstan Respublikası Prokurorı orınbasarı E.Qayıpbergenov, Qaraqalpaqstan Respublikası Nuranıylar ken’esi baslıg’ı Sh.Usnatdinov, Qaraqalpaqstan xalıq shayırı X.Da’wletnazarov ha’m ataqlı stipendiya jen’impazları so’zge shıg’ıp, jıynalg’anlardı bul quwanıshlı waqıya menen ha’m jaqınlap kiyatırg’an “14-yanvar Watan qorg’awshıları ku’ni” bayramı menen qutlıqladı.

Son’ respublika ko’rkem-o’ner iyeleri ha’m universitettin’ “Hu’rliman” xalıq ansambli atqarıwshılarının’ kontsert bag’darlaması qoyıp berildi. Sonın’ menen birge miymanlar rekonstruktsiyadan shıqqan bas bina bo’lmelerin ha’m o’nerli studentler ta’repinen tayarlang’an ko’rgizbeni tamashaladı.