Мистер Браўн узақ саяхаттан соң, кеште мийманханаға барады. Ол мийманхана хизметкеринен «Бул жерде бос хана барма?»,-деп сорайды. Сол ўақытта және бир сайахатшы мийманханаға келип, ол да бос хана сорайды. Мийманхана хизметкери тек еки адамлық бир хана бар екенлигин айтады. «Егер екеўиңиз бир ханада түнеп қалыўға разы болсаңыз, хананың гилтин сизлерге беремен. Және де сизлерге арзанырақ болады, себеби, екеўиңиз хананың пулын бөлисип төлейсиз»,-дейди хизметкер.

Еки саяхатшы да бул пикирге разы болмайды. Бирақ, сол гезде бирден нөсерлеп жаўын жаўып кетеди, олар басқа мийманханаға барыў ушын жүдә шаршаған еди. Кейин олар сол мийманханада түнеп қалыўға разы болады. Олардың затлары ишке алып кириледи ҳәм екеўи жаўын менен жолдас болған ҳалда уйқыға кетеди. Түн ортасында Мистер Браўн қатты даўыстан ойанып кетеди. «-Кеширерсиз, мен сизди оятып жибердим. Мен астма кеселине шалынғанман. Өзимди жаман сезип атырман. Оған қосымша басым да аўырып атыр. Егер мениң өлиўимди қәлемесеңиз тезирек айнаны(терезени) ашың»,-дейди Мистер Браўнның жолдасы. Мистер Браўн краватынан секирип түсип, жолдасын излей баслады. Бирақ, хана қараңғылығы себепли жолдасын табыў қыйын болды. Лекин, наўқас жолдасының ыңырсып «Ҳаўа, ҳаўа… маған таза ҳаўа керек. Мениң аҳўалым жаман», деген сөзлеринен жолдасын таўып алады. Кейин Мистер Браўн айнаны ашыўға ҳәрекет етеди. Бирақ, айна ҳә дегенде ашыла бермейди. Аўырған жолдасының ыңырсыған даўысы қаттырақ шыға бергенинен қәўетерленген Мистер Браўн тез де отырғышты алып айнаны сындырады. Наўқас жолдасы ыңыраныўын тоқтатып, жолдасынан миннетдар болады ҳәм өзин жақсы сезип атырғанын айтады. Солай етип екеўиде тыныш уйықыға кетеди.

Азанда турғанда айнаның(терезе) жабық ҳәм пүтин екенлигин, лекин айнаның(адам қарайтуғын айна) сынғанлығын көрип ҳайран болады.

Әне қыялдың күши. Адамзаты өзин ҳәр қандай нәрсеге исендирсе, оған ҳәмме нәрсениң шешими аңсат ғана болып көринеди.


Инглис тилинен аўдармалаған: Сахибжамал Есемуратова
Бердақ атындағы ҚМУ журналистика
қәнигелигиниң студенти
сүўрет: public-domain.zorger.com