2013 jıl 24 sentyabr ku’ni “Tu’rkistan” sarayında “MIT.uz” milliy internet-tan’lawı jen’impazların sıylıqlaw ma’resimi bolıp o’tti.

“MIT.uz” milliy internet tan’lawı “Kamolot” jaslar sotsiallıq ha’reketi baslaması ha’m bir qatar ministrliklerdin’ sho’lkemlestiriwinde usı jıldın’ 1 martınan 1 avgust ayına shekem dawam etti. İlaj jaslardı globallasıw sharayatında informatsiya hu’jimlerinen qorg’aw, olardın’ zamanago’y informatsiya texnologiyalarınan paydalanıw ko’nlikpesin asırıw, a’melge asırılıp atırg’an reformalardı internet tarmag’ı arqalı ken’ jarıtıp beriw ha’mde jaslar qatnasıwın ken’eytiwge qaratılg’an.

“MIT.uz” milliy internet-tan’lawı ma’mleketimiz informatsiya resursları ha’m servislerin jaratıw ha’mde rawajlandırıw, jaslar ushın arnalg’an, sonday-aq informatsiya ma’deniyatın qa’liplestiriwge ja’rdemlesetug’ın sapalı internet-jobalardı ken’ jarıtıw, qa’wipsiz internet ma’ka’nın ta’miyinlew, ziyrek jaslardı xoshametlew, jas veb-dizaynerler ha’mde bag’darlamashılardı materiyallıq ha’m ruwxıy qollap-quwatlaw, internette jaslar segmentin ja’nede ken’eytiw ha’m rawajlandırıwg’a qaratılg’an.

“Kamolot” jaslar sotsiallıq ha’reketi ta’repinen bul tarawda bir qatar ilajlar o’tkerildi. Mırza Ulug’bek atındag’ı O’zbekstan Milliy universitetinde videokonferentsiya formasında o’tkerilgen milliy internet-tan’lawı prezentatsiyasında ma’mleketimizdin’ barlıq aymaqlarınan jas bag’darlamashılar, veb-dizaynerler ha’m internet-saytları avtorları qatnastı.Watanımız g’a’ressizliginin’ 22 jıllıg’ına arnalg’an jaslar festivalları shen’berinde “Biz – salamat informatsiya ortalıg’ı ta’repdarımız!” su’reni astında milliy internet-tan’lawının’ u’gitlew ilajları bolıp o’tken edi.

Tan’lawda 14 jastan 30 jasqa shekemgi mın’nan aslam jaslar qatnastı. UZ domeninin’ veb-resurslarınan tısqarı sırt elli domenlerde jaylastırılg’an saytlarda bul tan’lawda qatnastı.

Tan’lawg’a do’retiwshilik jumıslar menen bir qatarda 225 internet-sayt, 700 arza – fotosu’wretler, videorolikler ha’m fotokollektsiyalarda usınıldı. Tan’law qatnasıwshılarının’ 70 payızı studentler bolıp tabıladı. Usınılg’an saytlardın’ 60 payızınan aslamı usı jılı o’z iskerligin baslag’an.

“MIT.uz” milliy internet-tan’lawı shen’berinde Tu’rkistan sarayında joqarı oqıw orınları ziyrek studentleri qatnasıwında bag’darlamalıq o’nimlerdin’ ko’rgizbesi bolıp o’tti. Ko’rgizbege 20 dan aslam studentlerdin’ tan’lawlı bag’darlamalıq o’nimleri qoyıldı. Ko’rgizbege qoyılg’an o’nimler menen jergilikli ha’m sırt elli miymanlar tanıstı.



Usı ko’rgizbede TİTU studenti jaratqan eki robot ko’pshiliktin’ na’zerin o’zine tarttı. Bul eki robotlardın’ o’z atı bar bolıp, olar ayrıqsha jag’daylar ju’z bergende ko’meklesiwge ha’reket etedi. Sonday-aq olarda IP kamerası bar bolıp, WiFi sımsız baylanıs tarmag’ı arqalı basqarıladı. Bul robottın’ birewi adam maketine sa’ykes jasalg’an bolsa, al ekinshisinin’ sırtqı ko’rinisi o’rmekshinin’ kelbetine sa’ykes. Ko’rgizbede sonday-aq kompyuter oyınlarıda tanıstırıldı. Eki saat dawamında o’tkerilgen ko’rgizbe juwmaqlang’annan son’ “MIT.uz” milliy internet-tan’lawı jen’impazların sıylıqlaw ma’resimi bolıp o’tti.

Tan’lawda qatnasqan 1002 do’retiwshilik jumıstın’ en’ jaqsıları tog’ız tiykarg’ı ha’m bes qosımsha nominatsiya boyınsha tan’lap alındı. Olardan, “O’zbekstannın’ bay ma’deniyatı, ko’rkem-o’neri, tariyxı ha’m g’a’ressizlik ideyasın sa’wlelendiretug’ın en’ jaqsı sayt”, “Ma’ha’lle, awıl ha’m qalanın’ en’ jaqsı fotosu’wreti”, “O’zbek mumtoz qosıg’ı ha’m a’debiyatın u’gitlewshi ha’m jaslar qatnasıwında tayarlang’an en’ jaqsı rolik”, “O’zbekstannın’ turistlik tarawın sa’wlelendiriwshi en’ jaqsı sayt”, “En’ jaqsı jan’alıqlar saytı”, “Paydalanıwshılar pikiri boyınsha en’ jaqsı sayt” ha’m basqa nominatsiyalar boyınsha birinshi, ekinshi ha’m u’shinshi orındı alg’an jen’impazlar diplom ha’m qımbat baha sawg’alar menen sıylıqlandı.



– Ma’mleketimizde ju’da’ u’lken qurılıs isleri bolıp atır, usı qurılıs isleri qatarında o’zimizdin’ tariyxıy estelikler, da’stu’rler tiklenbekte, usı qatarda Nawayı wa’layatındag’ı Nurata qalasındag’ı Chashma estelik kompleksi qaytadan tiklendi. Chashma estelik kompleksi a’tirapında u’lken bag’ jaratılıp, og’an ha’zirgi ku’nde u’lken fontan ornatılg’an. Ja’ne qurılıs isleri dawam etpekte. Bul usı qurılıs islerin ko’rsetiw, usı xalıq pa’rawanlıg’ının’ abat bolıp atırg’anlıg’ın ko’rsetiw maqsetinde men chashma.uz saytın jarattım ha’m bul saytım arqalı “MIT.uz” tan’lawına ba’ha’r ayında qatnastım. “MIT.uz” tan’lawı ko’plegen jas talantlı bag’darlamashılardı o’zin sınap ko’riwine mu’mkinshilik jarattı dep oylayman, -deydi chashma.uz saytının’ avtorı Razakov Azamat.

– Men usı tan’lawda o’zimnin’ jz.uz Jizzaq informatsiya portalı saytı menen qatnastım. Usı saytta Jizzaq wa’layatının’ pa’rawan turmısı, o’zine say ta’repleri, turistlik, sotsial-ekonomikalıq jaqların sa’wlelendiriwge ha’reket ettim. Qılg’an miynetlerimizdi joqarı bahalap, jyuriy ag’zaları, arnawlı ekspert komissiya ta’repinen jaqsı bahalanıp birinshi orındı iyeledim. Usı tan’law shen’berinde ja’ne bir jetiskenliklerimizden biri arnawlı ekspertler ha’m qa’niygeler ta’repinen aldag’ı jumıslarımızg’a ken’esler ha’m bag’darlar berildi, onnan tısqarı basqa sayt iyeleri menen ta’jiriybeler arttırdıq. Keleshekte ja’ne qospa jobalardı a’melge asırıw ushın kelisip aldıq, - deydi Jizzaq wa’layatınan qatnasıp jen’impaz bolg’an Raximov Feruz.

Xoshametlew ma’resimi joqarı ko’terin’kilik da’rejede o’tkerildi. Ha’r nominatsiya oqıp esittirilip, jen’impazlar diplom ha’m “MIT.uz” tan’bası basılg’an estelik, sonday-aq ushinshi orındı alg’an jen’impazlar LED Televizorlar menen sıylıqlansa, ekinshi orın jen’impazları qımbat bahalı nowtbuktı qolg’a kiritti al birinshi orın jen’impazları bolsa iPad 3 plansheti menen sıylıqlandı.



“Tu’rkistan” sarayında saltanatlı ta’rizde bolıp o’tken “MIT.uz” jen’impazlarının’ xoshametlew ma’resiminde ataqlı estrada juldızlarının’ kontsert bag’darlaması jıynalg’anlarg’a zawıq bag’ıshladı. Solay etip birinshi ma’rte o’tkerilgen “MIT.uz” milliy internet-tan’lawı ko’terin’kilik ruwxta juwmaqlandı ha’m ko’pshilik esinde umıtılmas waqıya bolıp qaldı.


Avtorı: B. Kalmuratov, megaline.uz ushın arnawlı