2013 jıldın’ 25-27 sentyabr aralıg’ında Tashkent qalasındag’ı “Ko’rgizbe sawda orayı” kompleksinde “InfoCOM – 2013” – informatsiya-kommunikatsiya texnologiyaları ha’pteligi shen’berinde “ICT-Expo – 2013” informatsiya texnologiyalarının’ xalqara ko’rgizbesi ashıldı.

Ha’r jılı da’stu’rge aylang’an “ICT-Expo” informatsiya texnologiyaları ko’rgizbesi Orta Aziya ko’lemindegi za’ru’r ha’m ataqlı ko’rgizbe maydanlarının’ biri bolıp tabıladı. İlajdın’ itibarlı ta’repi sonnan ibarat, usı jılda ko’rgizbe xalqara atamasına iye boldı ha’m bul O’zbekstan ha’m sırt elde informatsiya-kommunikatsiya texnologiyaları tarawında onın’ a’himiyeti artıp baratırg’anlıg’ınan derek beredi.



“ICT-Expo–2013” informatsiya texnologiyaları ko’rgizbesi bir waqıttın’ o’zinde Tashkent ha’m Jizzaq qalalarında o’tkerilgenligi informatsiya texnologiyaların turmısımızdın’ barlıq tarawlarına engiziw da’rejesi aymaqlarda da jedel artıp atırg’anlıg’ın ko’rsetedi. Al ilaj dawamında sho’lkemlestirilgen videoko’pir bolsa, ko’rgizbege kelgenlerge ha’r eki ko’rgizbe eksponantları menen tanısıw mu’mkinshiligin jaratıp berdi.

Ko’rgizbede informatsiya texnologiyalarının’ sistemalı integratsiya, bag’darlamalıq ta’miynat islep shıg’ıw, kompyuter texnikasın qurastırıw, dilerlik sıyaqlı tarawlarda joqarı texnologiyalı o’nimlerdi islep shıg’arıwg’a qa’niygelesken 150 den aslam milliy ha’m sırt ellik kompaniya, sonday-aq, mobil baylanıs operatorları, baylanıs ha’mde mag’lıwmatlardı uzatıw provayderleri o’z stendlerin usındı. Qubla Koreya, Ukrayna, Qıtay, Yaponiya, Germaniya, Sloveniya sıyaqlı ma’mleketlerdin’ wa’killeri to’rt ju’zden aslam tu’rdegi joqarı texnologiyalı tovar ha’m xızmetlerdi jıynalg’anlar itibarına ko’rsetti.

Ma’mleketimiz telekommunikatsiya bazarının’ jetekshisi bolg’an “O’zbektelekom” aktsionerlik kompaniyası pavilonında usı xalqara ko’rgizbenin’ ashılıw ma’resimi bolıp o’tti. Kompaniya zamanago’y telekommunikatsiya tarmaqlarınan paydalang’an halda dawıslı baylanıs, mag’lıwmatlar ha’m teleradioesittiriw bag’darlamaların uzatıw, videokonferents-baylanıs, internetten paydalanıw, CDMA-450 standartına tiykarlang’an mobil ha’m ko’shpes baylanıs xızmetlerin ko’rsetpekte. Bıyılg’ı “ICT-Expo” informatsiya texnologiyaları xalqara ko’rgizbesinde usı kompaniya jan’a tu’rdegi xızmetlerdi usındı. Atap o’tsek, elektron kartada transportlardın’ jaylasqan ornın gu’zetiw, tovarlar jetkerip beriw logistikasın baqlaw, qa’legen waqıtta avtomobiller bag’ıtların analiz etiw mu’mkinshiligin beretug’ın jan’a GPS-monitoring xızmetin ko’rsetpekte.



“Elektron hu’kimet” texnologiyalıq bag’darı ko’rgizbenin’ za’ru’r bo’limine aylandı. Usı bag’darda a’melge asırılıp atırg’an jobalardın’ en’ jaqsı u’lgileri usınıldı. Ko’rgizbe bag’darlaması ra’n’-ba’ren’ bolıp, onda ko’plegen seminarlar, do’n’gelek stol sa’wbetlesiwler, tu’rli ila’jlar ha’m tan’lawlar sho’lkemlestirildi. İlajdın’ da’slepki ku’ninde O’zbekstanda internet-provayding ha’m milliy kontentti rawajlandırıwg’a arnalg’an sa’wbet boldı. Onda Baylanıs, informatsiyalastırıw ha’m telekommunikatsiya texnologiyaları ma’mleketlik komiteti, “O’zbektelekom” kompaniyası ha’mde O’zbekstan internet provayderleri wa’killeri xalıqqa internet xızmetin ko’rsetiwge baylanıslı ma’seler ken’ talqılandı.

Tashkent informatsiya texnologiyaları universiteti studentlerinin’ islep shıqqan bag’darlamalıq o’nimleride bul ko’rgizbede ko’pshilik na’zerine usınıldı.



“ICT-STUDENTS” kompyuter sportı universiadası da bolıp o’tti. Jarısta kompyuterdi belgili waqıt ishinde jıynaw, internetke shıg’atug’ın qa’wipsiz lokal tarmaqtı sho’lkemlestiriw ha’m temag’a baylanıslı internet betti jaratıw sıyaqlı jarıslar o’tkerildi. Sonday-aq, “WCG-2013” ja’ha’n chempionatına qatnasıw huquqın beriwshi “FIFA-13” oyınlarının’ saylaw turniri bolg’an “Zo‘r-Zo‘r UCG–2013” final basqıshıda o’tkerildi.













Elimizdegi informatsiya-kommunikatsiya texnologiyaları tarawındag’ı son’g’ı jetiskenlikler “ICT-Expo– 2013” ko’rgizbesinde ken’ sa’wlelendi.


Avtorı: Kalmuratov Bekbosın