Ronaldunın’ komandası Chempionlar ligasında Germaniyanın’ “Shalke” komandasınan 3:4 esapta utılıp qaldı. Bul na’tiyje portugaliyalıq futbolshıg’a qattı ta’sir etken bolıwı mu’mkin. Ha’tte oyınnan son’ maydannan ketip baratırg’an Ronaldu komandalası Benzemag’a “Bul uyatg’o” dep, keypiyatı bolmag’anın ayttı. Sonday-aq ol, oyınnın’ na’tiyjesi ha’m komandanın’ oyınına kewli tolmag’anın, sol sebepli G’XQ wa’killeri menen ushırasqısı kelmeytug’ınlıg’ın ma’limledi.

90 minutlıq oyınnan son’ Krishtianu baspaso’z wa’killerinin’ sorawlarına “Men ha’zir hesh na’rse aytpayman. Ulıwma, ma’wsim son’ına shekem G’XQ wa’killeri menen so’ylespeymen”, - dep qısqa so’yledi ha’m ketip qaldı. Demek futbolshı may ayına shekem jurnalistler sorawlarına juwap bermeydi degen so’z.

Esletip o’temiz, “Real madrit” “Shalke”den jen’ilgenine qaramastan, Chempionlar ligasının’ sherek finalına shıqtı. Sebebi, u’sh ha’pte burın Gelzenkirxende o’tkerilgen da’slepki oyında madritlikler 2:0 esabı menen jen’gen edi. Sol oyında Ronaldu bir ma’rte mergenligi menen ko’zge tu’sse, keshegi ba’sekide eki goldın’ avtorına aylandı.


Baspaso’z materialları tiykarında tayarlandı.