ТИТУ Нөкис филиалында усы жылдың 9-апрель күни “Программалық ҳәм техник исленбелер” көргизбеси шөлкемлестирилди. Көргизбеге филиалдың зийрек студентлеринен 58 и қатнасып, ислеген исленбелерин көпшилик нәзерине усынды. Сондай-ақ информациялық технологиялар бағдары бойынша филиалға бириктирилген Нөкис компьютер ҳәм информациялық технологиялары кәсип өнер колледжи, Кегейли қурылыс ҳәм информациялық технологиялары к.ө. колледжи ҳәмде Хожели байланыс ҳәм информациялық технологиялары к.ө. колледжлери қатнасты.

Информациялық технологиялардың раўажланыўы, олардың программалық тәмийнаты ҳәм миллий информация ресурслары менен байытыў, интерактив хызмет түрлерин көбейтиў, өз-ара коммуникация мәселелерин шешиў, аймақлық ҳәм халқаралық коммуникация тармақларына жалғаныў ҳәмде олардан пайдаланыўды шөлкемлестириў процесси тараў қәнигелери алдына бир қатар ўазыйпаларды қоймақта. Атап өтсек, бул процесстен Ташкент информациялық технологиялары университети Нөкис филиалы профессор-оқытыўшылары ҳәм студентлериде шетте емес.

Университетте халқара стандартлар талапларына жуўап беретуғын жоқары тәжирийбели қәнигелерди таярлаў мақсетинде компьютер инжиниринг, программалық инжиниринг ҳәм телекоммуникация технологиялары сыяқлы жаңа билимлендириў бағдарлары ашылды.

Усы көргизбе де жоқарыдағы ис-илажлардың логикалық даўамы болып, университет ҳәм оның аймақлық филиаллары студентлериниң белсендилигин асырыў, илимий искерликке бағдарлаў, олардың интеллектуал потенциялын раўажландырыў ҳәмде инталы жасларды хошаметлеў сыяқлы мақсетлерди өз ишине қамтыйды. Бир сөз бенен айтқанда, ҳәр бир студент ушын имканиятлар майданы.

Көргизбеге қойылған исленбелерди көриў мақсетинде ТИТУ НФ студентлери ҳәм профессор-оқытыўшылары менен бир қатарда көплеген орынлардан мийманлар келди, атап өтсек, Өзбекистан Республикасы информациялық технологиялары ҳәм коммуникацияларды раўажландырыў министирлигиниң Қарақалпақстан Республикасы аймақлық басқармасынан қәнигелер, Өзбектелеком АЖ ҚР филиалынанда мийманлар қатнасты.