U’yleniw an’sat, u’y bolıw qıyın deydi dana xalqımız. Shan’araq qurg’an er jigit endi burıng’ı boydaq ku’nlerin umıtıp, keleshekke ha’m shan’arag’ına u’lken juwapkerlik penen qarawı kerek. U’yleniw degen tek toy berip, balalı bolıw menen g’ana sheklenbeydi. Onın’ astarında u’lken juwapkerli wazıypalar bar ekenin esletip, shan’araq qurg’an jigitlerdin’ qulag’ına to’mendegi ken’eslerdi aytpaqshıman.

Endi boydaq emessen’!
Boydaqlıq da’wir o’tti de ketti. Endi u’y bolıwdın’ g’amın oylaytın joldı tan’lag’an – o’zin’. Endi artqa jol joq. Boydaq waqıttag’ı a’detlerdin’ derlik ha’mmesinen qutılıwg’a ha’reket et. Ko’p waqtın’dı shan’arag’ına arna.

Sen o’z shan’arag’ın’dı qurdın’!
Kamalg’a kelip, er jetip o’z shan’arag’ına iye boldın’. O’zin’nin’ kishi ma’mleketin’di qurdın’. Ha’zirshe ekewsiz. Erten’ xalqın’ ko’beyedi. Sen olardın’ ha’mmesine juwapkersen’: iship-jewine, kiyim-kenshegine, ta’lim-ta’rbiyasına! O’z qurg’an ma’mleketin’di gu’lletiw o’z qolın’da.

Sen- bolajaq a’kesen’!
A’ke bolg’anna keyin juwapkershiliktin’ salmag’ıda artadı. A’ke bolıp, balan’a o’rnek bolıw senin’ moynın’da. Sebebi balan’ uyada ko’rgenin qıladı. Keleshekte perzentin’izdin’ jetiskenliklerge erisiwin qa’lesen’iz, onı uyan’da durıs ta’rbiyalawın’ız kerek.

Sen endi bir go’zzaldın’ ku’yewisen’.
Hayal – bul u’ydin’ berekesi. Ol shan’araqtı nurlandırıp turadı. Kelinshegin’di qa’dirlesen’, o’sip kiyatırg’an balaların’ qız balanı hu’rmetlew kerekligin u’yrene baslaydı. Hayal adamg’a dawıs ko’terip so’ylemegen maqul. Aqıllı hayal ku’yewinin’ aytpag’anın ko’zinen-aq bilip turadı.

Sen endi ku’yew balasan’!
Sen bir ata-ananın’ qızın yar qılıp alıp otırsan’. Usınday qızdı ta’rbiyalag’an olarg’a bolg’an hu’rmetin’de ayrıqsha bolıwı kerek.


Tayarlag’an: Kamilla.
su’wret: foto-amur saytınan.