Еситиўимизше, бурынғы ўақытлары аяқ ойыншылардың ойынларына көпшилик тән берип, тойларға арнаўлы шақыртылып, олардың шеберлигине қайыл қалып, қурбы жеткенлер пул қыстыратуғын болған. Сонлықтан аяқ ойыншылар мерекени еле де қыздырып, ойын-заўық пенен қурға ләззет берсин деген мақсетте мирәт етилген.

Ҳәзирги күнлерде той мерекелерге арнаўлы шақыртылған қосықшылар менен бирге келген аяқ ойыншылардың ҳәрекетлери мениң көзиме жүдә ерси көринбекте. Себеби, қараған көзге олардың айрымлары, басым көпшилиги десек те болады, жаслар тойларында тартынбастан, ашықтан-ашық той басланыўынан тап жуўмақланаман дегенше, келген мийманлардан, әсиресе ер адамлардан дәмегөйленип, қалай болмасын бос қол қалмаўды нәзерде тутып ҳәрекет еткендей түйиледи, ең ерси көринген жери, алдына шығып ойнап турған адамның жасы кишилиги яки ғаррылығына қарамастан, қашан пулды шығармағанша үстине сүйкелип, унамсыз ҳәрекетлер ислеп, оның қасынан кетпей турып алады.

Ол адамның қалтасында пулы бар ма я жоқ па? Ол аўқатланып отыр ма? Жақын ағайин-туўысқанлары менен мәсләҳәтлесип атыр ма, ол жағы ойыншыны қызықтырып атырған жоқ. Қашан қолына пул тиймегенше, бир адым былай кетпейди. Айрымларының кийинген кийимлерине қараўға да уяласаң. Қалтасынан пул шығарып бере алмай атырған адам, көпшиликтиң арасында қатты қысыныспаға түсип қалады. Усы жағдай базы бир ашыўшақ адамлардың ғәзебин келтирип, қопал гәплерди айтып жиберип атырғанлығын да еситип қаламыз. Усыған қарамастан, жылдан-жылға бундай «аяқ ойыншылардың» той мийманларынан «пул жыйнаў» ойынлары ҳәдден зыят болып баратырғандай. Тойдағы аяқ-ойыншылардың бундай ерси ҳәрекетлери профессионал ойыншылардың, устазларының абыройына дақ түсирмес пе екен?

Себеби олардың кәсиплик ўазыйпасында да жоқарыдағы айтып өтилген ис-ҳәрекетлер көзде тутылмаған болса керек? Мәденият, көркем –өнер тараўы қәнигелери ҳаққында ойлағанымызда, биз халыққа мәдениятты сиңдириўши, руўхый азық бағышлаўшы, өзгеше қәбилетке ийе, пүткил халық танып, ҳүрмет ететуғын инсанларды түсинемиз.

Демек, ҳәр бир мәденият тараўы хызметкерлеринен келешегимиз болған жаслар үлги алады, оларға еликлейди. «Той десе қуў бас жумалайды»-дегениндей, тойларға түрли жастағы адамлар келеди. Жасы үлкенлер айрым аяқ ойыншылардың жаслар тойындағы бундай ерси ис-ҳәрекетлерин мәдениятсызлық, әдепсизлик-деп баҳаласа, ал жасларымыз буны «мәденият»-деп, өзине үлги сыпатында алады. Биз қәлесекте, қәлемесекте, олар да бул ис-ҳәрекетлерди қайталаўы итимал. Бундай ис-ҳәрекетлер белгили бир дәрежеде жасларымыздың тәрбиясын бузып атырған жоқ па? Бәлким жоқарыдағы машқалалар бойынша тийисли тараў қанигелери ҳәр тәреплеме ойлап көргени мақул шығар, деп ойлаймыз.


Муслима Мамбетниязова,
Бердақ атындағы Қарақалпақ мәмлекетлик
университети филологиясы факультети
журналистика қанигелигиниң 3 а- курс студенти.
Сүўрет: youtube сайтынан.