İnformatsiya uzatıwda ha’m onı waqtında jetkerip beriwde televideniyenin’ ornı girewli. Bu’gingi televideniye keshegiden basqasha. Telekommunikatsiya texnologiyaları rawajlanıp atırg’an bir da’wirde televideniye tarawıda anag’urlım rawajlanıp jan’adan jan’a formatlar payda boldı. Tsifrlı televideniyenin’ rawajlanıwı menen ko’plegen ma’mleketler bu’gin tsifrlı formatqa o’tti. Tsifrlı efir uzatıw xızmeti mu’mkinshilikleri astı. Bunda ekrandag’ı ha’r bir ko’rinis joqarı tınıqlıqta ha’m ken’ formatta ko’rsetiledi. Sonday-aq ha’r bir tele ha’m radio kanallar ushın interaktiv xızmet ko’rsetiw mu’mkinshilikleri jaratılg’an. Ha’zirgi waqıtta tsifrlı televideniyenin’ bir neshe tu’rleri bar. Usılardın’ biri efirli-tsifrlı televideniye bolıp tabıladı. O’tken jılı No’kis qalası teleorayı ta’repinen efirli-tsifrlı formatta 12 telekanaldı uzatıw iskerligin baslag’an edi. Xalqımız joqarı tınıqlıqtag’ı, ken’ formatlı telekanallar ko’riw mu’mkinshiligine iye boldı. Mine endi olardın’ qatarına Qaraqalpaqstan telekanalı da qosıldı.

Qaraqalpaqstan telekanalı tsifrlı televideniyege qosılıwı menen bir qatarda pu’tkil du’nya ju’zi tamashago’yleri ko’riw mu’mkinshiligine iye boladı. Yag’nıy jaqın ku’nlerden baslap MTRK.uz saytı arqalıda informatsiya tarqatadı. Bul degeni elimizdin’ shıraylı kelbetin ha’m jag’ımlı hawazın pu’tkil du’nya tamashago’yleri tamashalay aladı.

Ha’zirgi waqıtta Qaraqalpaqstan Respublikası aymag’ında No’kis qalasınan 60 km aralıqtag’ı qala ha’m rayonlarg’a DVB T2 (Mpeg 4) formatındag’ı 12 telekanal uzatılmaqta. Bul jan’a formattag’ı telekanallardı ko’riw ushın DVB T2 formatın qollay alatug’ın televizorlar arqalı ko’riwge boladı yamasa analog televizorlar ushın arnawlı DVB T2 tyuner arqalı tamashalawg’a boladı.

Ha’zirgi waqıtta islep shıg’arılıp atırg’an televizorlardın’ ko’pshiligi DVB T2 standartın qollaydı. Bul standart arqalı HD (high- definition) formattag’ı telekanallardı da ko’riwge boladı. HD formatının’ kelip shıg’ıwının’ baslı sebebi ken’ formatlı televizorlardın’ kelip shıg’ıwı menen baylanıslı. Son’g’ı jıllardag’ı tele-o’nimler, ko’rkemfilmler HD formatında tu’sirilip, onı analog televizorlar formatına o’tkerilgen (SD) video-o’nimlerdi tele ekranlar arqalı jiyi ko’remiz. Endi telekanallarımız tolıq tsifrlı formatqa ko’shkennen son’ HD video o’nimlerin tolıq formatta ko’riw mu’mkinshiligine iye bolamız.

Mine endi Qaraqalpaqstan telekanalın tsifrlı efirden ko’riw mu’mkinshiligine iyemiz. Ja’ne bir imkaniyatlardın’ biri ha’zirgi waqıtta elimizdegi internet provayderleri TAS-IX tarmag’ındag’ı saytlarg’a biypul kiriw imkaniyatı jaratılg’an. Demek jaqın arada mtrk.uz saytına Qaraqalpaqstan telekanalı qosılsa elimizdin’ tu’pkir-tu’pkirindegi tamashago’yler biypul joqarı tınıqlıqta internet tarmag’ınan da ko’riw mu’mkinshiligine iye boladı.


Bekan's blog