Twitter kompaniyası jaqında o’zinin’ jetiskenlikleri tuwralı xabarladı. Yag’nıy Twitter akkauntın paydalanıwshılar 200 million adamg’a jetkeni aytıldı. Dizimdegi belsendi paydalanıwshılar dep Twitter kompaniyası o’z akkauntınan ayına bir ret mikroblog ja’riyalaytug’ın paydalanıwshılardı da qosqan eken.

"Biz sizler menen birgemiz. Bizin’ tarmaqqa dizimge alıng’an adamlarg’a ko’p raxmet", - deydi kompaniyanın’ jetekshileri.

Twitter paydalanıwshılarının’ sanı 100 millionnan asqanın kompaniya o’tken jıldın’ sentyabr ayında ja’riyalag’an edi. Al 2012 jıldın’ may ayında paydalanıwshılar sanı 140 milliong’a jetken. Sol waqıttag’ı esap boyınsha Twitter mikroblogında 340 million tvit dizimge alıng’an.

Son’g’ı waqıtları bul internet tarmag’ının’ jedellik penen rawajlanıp atırg’anına ilimpazlar Apple kompaniyasının’ Twitter ushın arnawlı jasalg’an iOS 5 bag’darlaması u’lken u’les qostı deydi. iOS 5 bag’darlaması arqalı paydalanıwshılar Twitter-ge qol telefonı, planshet arqalı da kire aladı.

Sonday-aq bul Twitter mikroblog tarmag’ı 2006 jılı iske qosılg’an. Ha’zirgi waqıtta ol sotsiallıq tarmaqlardın’ ishinde 1 milliard paydalanıwshıları bar Facebook kompaniyası menen ba’sekelese almaydı.