Go’zzal insang’a aylanıwdı qa’leysiz be? Bizin’she bul sorawg’a derlik ko’pshilik “a’lbette” - dep juwap beriwi anıq.

Demek go’zzal bolıwdın’ sırı nede eken? Qaysı ta’repleri menen go’zzallar ko’pshiliktin’ dıqqatın tartpaqta? Kelin’ usı sorawlarg’a juwap izlesek.

-Ku’shli talg’am menen tan’lang’an kiyim
Kiyimin’izdi basqa na’rseler menen uyg’ınlastırıp, og’an say tu’rdegi bezeniw buyımların tan’lag’anın’ız maqul.

Ha’tteki qa’ddi qa’wmetin’izdin’ bazı bir kemshiliklerin talg’am menen tan’lang’an kiyimde sezilmewi mu’mkin. Azıw jollarısızda (dieta) sulıw ko’riniwge boladı.

Moyın
Moynı kelte hayal-qızlarımızg’a ba’lent, aylanba ha’m tuwrı mu’yeshli “kare” oyılg’an jag’alı kiyimlerdi kiymegenin’iz maqul. Olarg’a V formadag’ı, ashıq jag’a, uzın marjan monshaqlar usınıs etiledi.

Jelkeler
Tar ha’m qıya jelkelerge a’dette ken’ jelkeli kiyimler jarasadı. Sonday-aq, bunday hayal-qızlarg’a bluzka yag’nıy jen’il materialdan tigilgen kofta ha’m sızıqlı, bu’rme jag’alar kiysen’iz boladı. Lekin, V formada oyılg’an kimano ha’m raglan usılındag’ı kiyimler usınılmaydı. Tuwrı jelkeli hayal-qızlarımızg’a bolsa V formadag’ı jag’anı tan’lasa boladı.

Qollar
Qollardı shıraylı ko’rsetiwdin’ en’ jaqsı usılı ashıq ren’degi manikyur ha’m original manjetler. Tompaq qollarg’a bolsa kimano ya’ki reglan tu’rdegi kiyiniw usınıladı, jen’siz tu’rdegi kiyimler tompaq qollarg’a jaraspawı mu’mkin.

Arqa
Arqası ken’ hayal-qızlarımızg’a ko’birek o’z qa’wmetine say keletug’ın bluzka ha’m svitrler kiyse boladı. Eger olardın’ arqası uzın bolsa, bel ta’repi qısqartılıp tigilgen yubkalar kiyse boladı. Boyı pa’s hayal-qızlarımız bolsa boyların uzınraq etip ko’rsetiw ushın sızıqlı kiyimler kiygeni maqul.

Bel
Ken’ bellilerge a’dette karsetler qolaylı. Eger sizin’ belin’iz de usı ko’riniste bolsa, kiyimin’izdin’ joqarg’ı bo’limi ashıq ren’li bolıwın ken’es beremiz.

Ayaq
Ayaq kiyimlerdi tan’lag’anın’ızda kiyimin’iz benen uyg’ınlastırıp alın’. Eger sizin’ ayaqların’ız tompaq bolsa, toq ren’degi, al azg’ın bolsa ashıq ren’degi ma’wsimge say ayaq kiyimlerdi tan’lag’anın’ız maqul. Ko’birek ayaqları du’zew qızlar dizege shekem bolg’an paltolardı kiyiwge boladı.

Ren’ler

Aq ren’ - ko’birek bul ren’ a’dette qara ren’li kiyimler menen uyg’ınlastırıladı. Ko’binese aq ren’li kiyimler jaz ma’wsiminde kiyiledi. Biraq bu’gingi ku’nde modelerlerimiz ta’repinen aq ren’degi gu’zgi ha’m qısqı kiyimler islep shıg’arılmaqta. Bul ren’ na’ziklikti bildirip, insandı lirikalıq sezimge bo’leydi.

Qara ren’ - Universal ren’ bolıp, ra’smiy ushırasıwlarg’a, jumıs orınlarına, toy-ba’zimlerge tuwrı keletug’ın ren’. Bul ren’degi koftalardı jaketler menen kiyse sulıw boladı.

Ko’k ren’ – Bunday ren’li kiyimler bu’gingi ku’nde klassikalıq usıldag’ı kiyimler esaplanadı. Ko’k ren’li kostyumnın’ yubkaları a’himiyetli ushırasıwlarg’a kiyiw mu’mkin.Biraq bunday ren’li kiyimlerdi ku’ndizgi waqıtları kiysen’iz boladı. Sebebi keshki waqıtlarda haqıyqıy ren’i o’zgeriwi mu’mkin ha’m ju’zin’izdi sharshag’an tu’rde ko’rsetedi.

Sarı ren’ – Belsendi, o’zine isengen ha’m u’mit penen jasap atırg’an insanlarg’a ta’n ren’. Ko’birek jaz ma’wsiminde kiyiledi.

Qızıl ren’ – Tez itibardı tartıwshı ren’. Bul ren’li kiyimler bayram ha’m zıyapatlarg’a kiyiledi. Qızıl ren’ qa’nshelli ashıq bolmasın, hesh qashan modadan qalmaydı.

Al siz qanday u’lgidegi kiyimlerdi kiyiwdi unatasız, qanday ren’ler unaydı? Kelin’ pikirleseyik!



Hu’rliman Nurjanova.

13 iyun, 2013 jıl