Microsoft kompaniyası usı jıldın’ jaz aylarında ko’pshilikke usınatug’ın Windows 10 operatsiyalıq sistemasının’ jeti tu’rli versiyasın ko’pshilikke tanıstırdı. Bul haqqında kompaniyanın’ ra’smiy blogında ja’riyalandı.

Ulıwma xalıqlıq versiyası – Windows 10 Home. Ol jeke kompyuterler ha’m nowtbuklerdin’ ko’pshiligine ornatıladı. Bunın’ ishinde ko’plegen sistemalıq xızmetler ha’m qollanbalar bar. Ma’selen, Microsoft Edge brawzer, Windows Hello adam kelbetin tanıw qollanbası, Cortana virtual ja’rdemshi ha’m t.b.

Windows 10 Pro versiyası – kishi bizneske arnalg’an. Onın’ bult texnologiyaları menen jumıs barısında ha’m mag’lıwmatlardı qorg’awg’a ja’rdemlesetug’ın birneshe qollanbaları bar.

Uyalı telefonlarg’a arnalg’an Windows 10 Mobile – Windowstın’ firmalıq qollanbaları menen sensorlı ekranlarg’a iykemlesken Office paketi bar. Continuum for Phone arnawlı optsiyası telefonın’ızdı jeke kompyuterge aylandırıwg’a ja’rdemlesedi.

Kishi ha’m u’lken bizneske arnalg’an Windows 10 Enterprise versiyası biznesti basqarıwg’a bag’darlang’an bolsa al, Windows 10 Mobile Enterprise smartfon yaki planshet arqalı biznesti ju’ritiwge qolaylı imkaniyat jaratadı. Windows 10 Education – oqıw orınları xızmetkerleri ha’m oqıwshılarg’a arnalg’an versiyası. Windows 10 IoT Core – to’lew terminalları, sanaat tarawları ha’m basqa qurılmalar menen jumıs islewge arnalg’an.


derek ha’m su’wret: hi-news saytınan.