Жаңаланыў ҳәм жасарыў байрамы болған Наўрыз халқымыздың ҳәр жылы, жыл даўамында асығып күтетуғын улыўма халықлық байрамларының бирине айланды. Ғәрессизлигимиздиң дәслебинен баслап миллий байрамымыздың қайта тиклениўи, халқымыздың әзелден бир биреўге меҳир мүриўбетли, қайыр сақаўат ҳәм кең пейилли сыяқлы пазыйлетлерин мазмун ҳәм мәнис жағынан анағурлым дәрежеде байытты. Жасларымыздың милийлигимизге, үрип әдет ҳәм салт дәстүрлеримизге болған ҳүрмет ҳәм итибары артып өзлигимизди бүгин дүньяға танытпақтамыз.

Шығыс халықларының жаңа жыл сыпатында қәдирлейтуғын байрамы Наўрыз негизинде жасарыў, жаңарыў мәўсими. Кеўиллерге жақсылық, абаданшылық, ийгиликли нийетлерди бағышлаўшы уллы күн. Көп ғана арзыў мақсетлерди өзинде жәмлеген бул сәне ҳәзирги күнде де халқымыз тәрепинен кең түрде қәдирленеди.

Тийкарғы байрам тамашаларының бири улыўма халықлық Наўрыз байрамы жаңа жыл сыпатында ҳәр бир инсан қәлбинде қуўаныш ҳәм шадлықларды алып келетуғын бул байрам кеўиллерге жыллылық инәм етеди. Республикамыздың барлық қала ҳәм районларында байрам салтанатлары жоқары шөлкемлескенлик пенен белгиленбекте.

Ата бабаларымыздан бизгеше жетип келген Наўрыз гөже ҳәм сүмелек тағамлары бүгин ҳәр бир мәҳәлле көшелеринде писирилип, турғынлар миллий аўқатымыз дәмин татпақта. Сондай-ақ Сүмелек сейиллери, басқада түрли илажлар менен спорт жарысларыда өз көринислерин таўып атырған байрам тамашалары пүткил халқымызды үлкен қуўанышқа бөлеп атыр. Барлық турғынлар бул байрамға белсене қатнаспақта. Жыйналғанлар халқымызды байрам менен қутлықлап жақсы тилек ҳәм нийетлерин билдирмекте. Түрли миллий тағамлар көргизбеси жыйналғанларға айрықша заўық бағышлады. Мәденият ҳәм спорт ислери бөлимлери жас талантлылары таярлаған Ассалам Наўрыз атамасындағы концерт бағдарламалары, атқарылған қосық ҳәм ойынлар ҳәр қыйлы шығыўлар менен байрам спорт ойынлары палўанлардың гүреси менен даўам етпекте.

Наўрыз ғарессизликтиң шексиз имканиятлар есиги екенин көрсетеди. Мәмлекетимизде ҳәр бир байрамның өз әҳимийети мазмун мәниси бар. Әсиресе әсирлер даўамында тарийхтың не не сынақларынан мәрдана өтип, халықтың турмысы менен терең байланысып кеткен бул күнлерге қайта жаңарып инсан қәлбине өзгеше заўық ҳәм шадлықларды бағышлаўшы бул әйямның салтанатыда кеўиллерге жақсы заўықлар алып келмекте. Миллий қәдирятларымыз ҳәм үрип әдетлеримизди өзинде жәмлеген байрам тамашалары елимиз бойлап даўам етпекте.