Stiv Djobs Apple korporatsiyasına tiykar saldı ha’m direktorlar ken’esinin’ basshısı lawazımında isledi. Sonın’ menen bir qatarda Stiv Djobs Pixar Animation Studios kompaniyasının’ CEO lawazımın atqardı. 2006 jılı The Walt Disney Company Pixar kompaniyasın satıp alg’an waqıtta Stiv Djobs Disney kompaniyasının’ direktorlar ken’esine ag’za boldı. 1995 jıldag’ı “Oyınshıqlar waqıyası” atlı multfilmnin’ atqarıwshı prodyusseri boldı.

Stiv Djobs (inglisshe, Steven Paul Jobs) 1955 jılı 24 fevralda Kaliforniya shtatındag’ı Mauntivyu qalasında tuwılg’an. Mektep waqtınan baslap Stiv elektronikag’a qızıqtı, sonday-aq mektep partasında o’zinin’ keleshektegi kollegası ha’m sherigi bolg’an Stiv Voznyak penen tanısqan.

1972 jılı mektepti tamamlag’annan son’ Stiv Portlendte (Oregon shtatı) jaylasqan Rid kolledjine oqıwg’a kirgen, biraq birinshi semestrda o’z erki menen oqıwdan shıg’adı. Biraz waqıt o’tkennen keyin Kaliforniya mektebine oqıwg’a baradı. Sol oqıwdın’ na’tiyjesinde ol Mac OS sistemasına ha’riplerdi ornatadı. 70- jıllardın’ son’ında Stiv Djobs kompyuter oyınların joybarlaytug’ın Atari kompaniyasına jumısqa kiredi.

1976 jılı Stiv Djobs o’zinin’ balalıqtag’ı dostı Stiv Voznyak penen birge Apple kompaniyasın du’zedi. Kompaniya ta’repinen islep shıg’ılg’an o’nimlerin satıw menen shug’ıllanadı. Stiv Djobs penen Stiv Voznyaktın’ da’slepki islep shıg’arg’an kompyuteri Apple I edi. Onın’ bahası 666 AQSH dollarına bahalang’an. Keyin Apple II islep shıg’arıladı. Bunın’ na’tiyjesinde bul eki insan u’lken abıroy menen u’lken ataqqa iye boldı. Kompaniya IPO arqalı birinshi ret birjag’a shıqqannan son’ Stiv Djobs multimillionerge aylandı.

1985 jılı direktorlar ken’esi menen arada bolg’an ja’njelden keyin Stiv Djobs Apple kompaniyasındag’ı jumısınan bosatıldı. So’ytip ol NeXT dep atalatug’ın kompaniya ashtı. Bul kompaniya bilimlendiriw tarawı menen shug’ıllandı.

1997 jılı ol Apple kompaniyasına waqtınsha atqarıwshı direktor retinde qaytıp keldi ha’m burıng’ı eki kompaniyasın biriktirdi.

2006 jılı Walt Disney Stiv Djobstan Pixar aktsiyaların 7,4 mlrd. dollarg’a satıp aldı. Stiv Djobs Disney kompaniyasının’ direktorlar ken’esinde isledi. Sonın’ menen bir qatarda Disney kompaniyasının’ aktsionerlerinin’ ishindegi en’ u’lken adamg’a aylandı. Yag’nıy onın’ menshigine kompaniyanın’ 7 payızı o’tken edi.

2003 jılı Stiv Djobs ishki organların tekseriw waqtında shıpakerler Stivtin’ o’t jollarında onkologiyalıq isiktin’ bar ekenligin anıqlaydı.

2004 jıldın’ avgust ayında Stiv Djobstın’ bawırın almastırıw boyınsha operatsiya boldı. Operatsiya Shveytsariyada o’tti. Stiv Djobs kompaniyada joq waqtında kompaniyanı Tim Kuk basqardı.

2004 jıldın’ oktyabr ayında Stiv Djobs operatsiyadan keyin xalıqtın’ aldına shıg’ıp, Kaliforniya shtatındag’ı kompaniyanın’ jan’a du’kanının’ ashılıw saltanatına qatnastı.

2008 jılı sentyabr ayında baspaso’z betlerinde Stivtin’ ko’p salmaq joytqanı tuwralı informatsiya talqılandı. Onın’ sebebi, keselligi asqınıwı degen boljawlar boldı.

2009 jıldın’ yanvar ayında Stiv Djobs kompaniyag’a qaytadan keletug’ınlıg’ın xabarladı. Biraq eki ha’pte o’tip, 6 ayg’a dem alısqa shıg’atug’ınlıg’ın aytqan. Sol jıldın’ iyun ayında Stiv bawır almastırıw operatsiyasınan keyin jumısın dawam ettirdi.

2011 jıldın’ 17 yanvarında Stiv Djobs kompaniya xızmetkerlerine bergen xatında densawlıg’ına baylanıslı Apple kompaniyasının’ atqarıwshı direktor lawazımınan ketetug’ınlıg’ın xabarladı.

2011 jıldın’ 5 okyabr ku’ni Stiv Djobs 56 jasında awır kesellikten du’nyadan o’tti.

Stiv Djobs AQSH tariyxında ayrıqsha tulg’a bolıp qaldı. O’zi o’lsede onın’ texnologiyaları xalıq iygiligi ushın xızmet etpekte.

Stivtin’ uran so’zi: “O’zim ko’terip alıp kete almaytug’ın kompyuterge isenbeymen”


15-aprel, 2013j.
Tayarlag’an: Kalmuratov B.

Paydalanılg’an a’debiyatlar:
1. Elkind, Piter Stiv Djobstın’ awhalları, Fortune 15-mart, 2008.
2. top.rbc.ru/society/06/10/2011/6121/73.shtml
3. Steve Jobs, Apple founder, dies CNN 5 oktyabr, 2011.