Ҳәр қандай жаңа ойлап табылған өним яки қубылыс инсанияттың келешек раўажланыўы ушын хызмет етеди. Ал, оны ойлап табыўшылар болса, өз ойлап тапқан нәрсесиниң жәнеде тез ислеўи, раўажландырыў ушын ҳәр қыйлы ҳәрекетти ислейди. Ҳәтте оның қурбанына айланыўыда мүмкин. Биз өз ойлап табыўының қурбаны болған изретлеўшилерди таңлап, олардың әжайып ашылыўлары ҳаққында айтыўды мақул көрдик.

Генри Смолински
Инженер Генри Смолински Northrop компаниясында тәжирийбе арттырады ҳәм уша алатуғын автомобильди ойлап табады. Атап өткен компания 1973-жылы Cessna Skymaster самолетының қуйрық тәрепи менен Ford Pinto автомобилин бириктирип базарға дәслепки ушатуғын автомобильди сатыўға шығарады.
Смолински ойлап тапқан автомобилиниң ислеп шығарыўын келеси жылы иске қосыўды жобаластырған еди. Лекин 1973-жылы 11-сентябрь күни сынақ ушыўын әмелге асырыў ушын ушыўшы Гарольд Блейк пенен бирге ушыў майданына жол алады. Тилекке қарсы ушыў даўамында қанатты услап турған бағана сынып кетип екеўиде набыт болады.

Мария Складовская
Химик ҳәм физик Мария Складовская-Кюри тек ғана радиоактивлик тараўында атаққа ерисип қоймастан, полоний ҳәм радий химиялық элементлериниң ойлап табыўшысы есапланады. Ол еки тараў яғный химия ҳәм физикадан Нобель сыйлығын алған биринши илимпаз болды. Кюри радиоактивлик теориясын ойлап тапты. Лекин оның инсан өмирине зыянлы тәрепин билмеген еди. Ол 1934-жылы 4-июль күни нурланыў себепли аллаптикалық анемиядан дүньядан көз жумды.

Валериан Абаковский
Орыс изертлеўшиси ойлап тапқан жокары тезликти көрсете алатуғын аэровагон сынаў ўақтында рельстен шығып кетип, ойлап табыўшы менен және бес адамның өмирин алып кетти. Оның вагоны самолет моторы ҳәм пропеллер менен үскенеленген саатына 140 километр тезликти көрсеткен еди. Абаковскийдиң ойлап тапқан вагоны дәслепки сынаўда жақсы ислеп турды, бирақ Москваға қайтып баратырғанда апатқа ушырады.

Франц Райхельт
Француз ойлап табыўшысы бос ўақытының барлығын ушыўшылар ушын парашют ислеў ушын жумсайтуғын еди. Ол ўақытлары аэропланлар жаңа ойлап табылған ўақыт болған. Апатқа ушыраған самолеттан катапулть арқалы шығып кетиўи ойлап табылмаған еди. Райхельттиң ойлап тапқан парашют костюми дәслепки сынақтан жақсы өтти. Оны өзи сынап көриўге бел байлады. Ол өз костюми менен Эйфель минарасының төменги бөлиминен секиреди. Лекин, оның ҳәрекети өмирине заўал болады.


Хурлиман Нуржанова таярлады.