2020 jılı jazg’ı Olimpiada oyınları Yaponiya paytaxtı Tokio qalasında bolıp o’tedi. Du’nyaju’zlik sport jarısına 8 sport tu’ri qosılıwı mu’mkin. To’rt jılda bir ma’rte o’tkeriletug’ın olimpiada oyınlarının’ tu’rli ayırmashılıqları boladı. Jan’a sport tu’rlerin kirgizip, ayırım tu’rleri alınıpta taslanadı. Xalıqaralıq Olimpiada komiteti olimpiadag’a kiritiliwi mu’mkin bolg’an tag’ı 8 sporttın’ tu’rin na’zerin’izge usınadı. Biraq anıq sheshim 2016 jıl avgust ayında qabıllanadı. Endi usı sport tu’rleri haqqında aytsaq.

Bouling



Bouling – XIX a’sirdin’aqırında AQSh ta payda boldı. Arnawlı qag’ıydaları qabıl etilip, sport tu’rinin’ qatarına kirgizildi. Biraq, bir a’sirden aslam tariyxqa iye sport tu’ri Olimpiada oyınlarının’ qatarına kiritilmegen. Al Tokioda bul sport tu’rinen da’slepki Olimpiada chempionı anıqlanıp qalıwı mu’mkin.

Softbol



Softbol – Olimpiada oyınlarının’ qatarına kirip, olimpiada oyınlarınan alınıp taslang’an sport tu’ri. Da’slep 1996-jılı Atlantada o’tkerilgen ja’han chempionatında softbol sportının’ chempionları anıqlandı. 2006 jılı Xalıqaralıq Olimpiada komitetinin’ qararı menen 2012-jılg’ı Olimpiada oyınlarına kirmey qaldı. Rio-de-Janeyro Olimpiadasının’ bag’darlamasına da softbol sport tu’ri kiritilgen joq.

Beysbol



Beysbol sportı ra’smiy tu’rde Olimpiada oyınlarındag’ı sport tu’rleri qatarına 1992-jılı Barselonada o’tken jarısta kiritildi. 2006 jılı softbol menen beysbol Xalqaralıq Olimpiada komitetinin’ qararı menen Olimpiadalıq sport tu’rleri qatarınan shıg’arıldı.

Karate



Yaponiya o’z elinde o’tetug’ın Olimpiadag’a milliy sportın qosıwg’a ha’reket etpekte. 2012 jılı London Olimpiadasına kiredi dep ku’tilgen edi. Keyin Xalıqaralıq Olimpiada komiteti dawıs beriw jıynalısında bul sport tu’ri joqarı upayg’a iye bola almadı. Karatenin’ Olimpiadag’a kirmewinin’ baslı sebebi – sportshılardın’ ko’p jaraqat alıwı bolıp tabıladı.

Tawg’a o’rmelew



Tawg’a o’rmelew – du’nyadag’ı en’ ataqlı sport tu’rlerinin’ qatarına kirmeydi. Ko’pshilik adamlar xobbi menen kewil ko’teriw ushın shug’ıllanadı. Ha’zirgi waqıtta bul sport tu’ri menen ka’siplik tu’rde shug’ıllanatug’ınlardın’ qatarı ko’beymekte. Bul sport tu’ri ha’zigi waqıtqa shekem Olimpiada dag’ı sport tu’rlerinin’ qatarına kirmegen.

Serfing



Serfing – ten’iz sport tu’ri bolıp tabıladı. Bul sport Tokiodag’ı Olimpiadag’a kiritilse, Serfing sport tu’rinin’ chempionlarıda anıqlanıwı mu’mkin.

Rolikli konki



Rolikli konki sport tu’ri menen shugıllanıwshı ha’wesker sportshılar du’nyada ju’da’ ko’p. Ha’r ku’ni bul sport tu’ri menen bir milliong’a shamalas adam shug’ıllanadı. Rolikli konki din’ tariyxı XVIII a’sirde baslang’an.

Ushu



Ushu – qıtay tilinen awdarg’anda a’skeriy tayarlıq degen ma’nisti bildiredi. Qıtay bul sport tu’rin XX a’sirden baslap en jaydıra basladı. Ataqlı Bryus Li din’ o’neri menen bul sport tu’ri du’nyag’a tanıldı. Ha’zirgi waqıtta ushu dan tu’rli xalıqaralıq jarıslar sho’lkemlestirilmekte. 2020 jılı Olimpiadag’a bul sport tu’ri de kiritiliwi mu’mkin.

Esletip o’temiz, Xalıqaralıq Olimpiada komiteti usı sport tu’rlerine baylanıslı juwmaqlawshı qarardı 2016 jıl avgust ayında qabıllaydı.



su’wret: mimi-gallery.com